លោក អន សុធារិទ្ធ អភិបាលរង នៃគណៈអភិបាលខេត្តកោះកុង បានអញ្ជើញដឹកនាំក្រុមការងារខេត្ត មន្ទីរជំនាញ និងរដ្ឋបាលស្រុក ឃុំ ចូលរួមជាមួយក្រុមការងារក្រសួងបរិស្ថាន ដឹកនាំដោយឯកឧត្តម ថៃ ចន្ថា អគ្គនាយករងតំបន់ការពារធម្មជាតិនៃក្រសួងបរិស្ថាន សហការជាមួយអង្គការសត្វព្រៃ និងរុក្ខជាតិ (Fauna & Flora)) ចុះពិនិត្យ ទីតាំង និងកិច្ចប្រជុំពិគ្រោះយោបល់លើកទី១ ស្តីពីការរៀបចំបង្កើតតំបន់ អភិរក្សជម្រក និងប្រភពដើមធនធានពន្ធុ (សេនេទិច) សត្វក្រពើភ្នំ ស្ទឹងកំពង់តាជៃ-ត្រពាំងពាង ស្ថិតក្នុងភូមិពោធិ៍បឹង ឃុំដងពែង ស្រុកស្រែអំបិល
លោក អន សុធារិទ្ធ អភិបាលរង នៃគណៈអភិបាលខេត្តកោះកុង បានអញ្ជើញដឹកនាំក្រុមការងារខេត្ត មន្ទីរជំនាញ និងរដ្ឋបាលស្រុក ឃុំ ចូលរួមជាមួយក្រុមការងារក្រសួងបរិស្ថាន ដឹកនាំដោយឯកឧត្តម ថៃ ចន្ថា អគ្គនាយករងតំបន់ការពារធម្មជាតិនៃក្រសួងបរិស្ថាន សហការជាមួយអង្គការសត្វព្រៃ និងរុក្ខជាតិ (Fauna & Flora)) ចុះពិនិត្យ ទីតាំង និងកិច្ចប្រជុំពិគ្រោះយោបល់លើកទី១ ស្តីពីការរៀបចំបង្កើតតំបន់ អភិរក្សជម្រក និងប្រភពដើមធនធានពន្ធុ (សេនេទិច) សត្វក្រពើភ្នំ ស្ទឹងកំពង់តាជៃ-ត្រពាំងពាង ស្ថិតក្នុងភូមិពោធិ៍បឹង ឃុំដងពែង ស្រុកស្រែអំបិល ខេត្តកោះកុង។
ក្រុមការងារបានចុះពិនិត្យទីតាំងចំនួន៣ចំណុច ដោយចំណុចទី១ និងទី២ ស្ថិតក្នុងខ្សែស្ទឹងតែមួយ(ស្ទឹងកំពង់តាជៃ) ផ្ទៃដីទំហំ ១៨០៧,៧០ហិកតា និងចំណុចទី៣ តំបន់ត្រពាំងពាង ផ្ទៃដីទំហំ ៧៨០ហិកតា ក្នុងនោះបានរកឃើញថា៖
-ចំណុចទី១ ជាខ្សែស្ទឹងធំ ជាជម្រកសត្វក្រពើភ្នំ មិនមានប៉ះដីស្រែចំការ ដែលប្រជាជនអាស្រ័យផលនោះទេ។
-ចំណុចទី២ ខ្សែស្ទឹងតូច(ដៃស្ទឹង) ប៉ះដីស្រែ ចំការប្រជាជន និងអាចជាទីតាំងសត្វក្រពើភ្នំបន្លាសទីឆ្លងកាត់ ដូច្នេះអង្គប្រជុំសម្រេចកាត់ចេញពីតំបន់អភិរក្សសត្វក្រពើភ្នំ តែក៏មិនអនុញ្ញាតឱ្យមានការរុករានកាប់ឆ្ការព្រៃថ្មីបន្ថែមពីសំណាក់ប្រជាពលរដ្ឋទៀតនោះទេ។
-ចំណុចទី៣ តំបន់ត្រពាំងពាង ជាដីបឹង និងជាទីតាំងសត្វក្រពើភ្នំពង (ស្ថិតក្នុងដី០១ ដែលបានវាស់វែងជូនប្រជាជន១៣ក្បាលដី តែដីនោះមិនមានដំណាំអ្វីនោះទេ) ដូច្នេះចំណុចទី៣ គួរស្នើដាក់ចូលជាតំបន់អភិរក្សសត្វក្រពើភ្នំ។
*** លទ្ធផលនៃការចុះពិនិត្យរកឃើញ និងការសម្រេចក្នុងកិច្ចប្រជុំរបស់ក្រុមការងារ នឹងត្រូវរៀបចំកំណត់ហេតុ និងរបាយការណ៍លម្អិត ដើម្បីជម្រាបជូនថ្នាក់ដឹកនាំនៃស្ថាប័នរៀងៗខ្លួន ក្នុងនោះកិច្ចប្រជុំរវាងថ្នាក់ដឹកនាំក្រសួងបរិស្ថាន និងរដ្ឋបាលខេត្តកោះកុង ស្តីពីការរៀបចំបង្កើតតំបន់ អភិរក្សជម្រក និងប្រភពដើមធនធានពន្ធុ (សេនេទិច) សត្វក្រពើភ្នំ ស្ទឹងកំពង់តាជៃ-ត្រពាំងពាង ស្ថិតក្នុងភូមិពោធិ៍បឹង ឃុំដងពែង ស្រុកស្រែអំបិល នឹងត្រូវរៀបចំនៅសាលាខេត្តកោះកុង ដើម្បីពិនិត្យ ផ្តល់អនុសាសន៍ និងសម្រេចនាពេលឆាប់ៗខាងមុខ។
ថ្ងៃព្រហស្បតិ៍ ៩កើត ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៣ ខែកក្កដា ឆ្នាំ២០២៦
