រដ្ឋបាលខេត្តកោះកុង

លោក សុខ សុទ្ធី អភិបាលរង នៃគណៈអភិបាលខេត្តកោះកុង បានអញ្ជើញចូលរួមការផ្សព្វផ្សាយ និងដោះស្រាយសំណងគោលនយោបាយ ជូនប្រជាពលរដ្ឋទាំង៥៨គ្រួសារ ដែលមានក្បាលដីពាក់ព័ន្ធនឹងទីតាំងគម្រោងសាងសង់រោងចក្រអគ្គិសនីដុតធ្យូងថ្មអានុភាព ៧០០ មេហ្កាវ៉ាត់ ស្ថិតនៅឃុំថ្មស ស្រុកបូទុមសាគរ ខេត្តកោះកុង ​ដែលប្រព្រឹត្តទៅនៅក្នុងបរិវេណវត្តថ្មស ឃុំថ្មស ស្រុកបូទុមសាគរ ខេត្តកោះកុង។
ការផ្សព្វផ្សាយ និងដោះស្រាយសំណងគោលនយោបាយ ជូនប្រជាពលរដ្ឋទាំង៥៨គ្រួសារ ដែលមានក្បាលដីពាក់ព័ន្ធនឹងទីតាំងគម្រោងសាងសង់រោងចក្រអគ្គិសនីដុតធ្យូងថ្មអានុភាព ៧០០មេហ្កាវ៉ាត់ ស្ថិតនៅឃុំថ្មស ស្រុកបូទុមសាគរ ខេត្តកោះកុងនេះ ប្រព្រឹត្តទៅ​ក្រោមវត្តមាន​ឯកឧត្តម ស្រ៊ុន ដារិទ្ធិ រដ្ឋលេខាធិការ​ក្រសួងបរិស្ថាន និង​វត្តមាន​អ្នកឧញ៉ា គិត ម៉េង ផងដែរ ។
ក្នុងឱកាសនេះដែរ ឯកឧត្តម ស៊្រុន ដារិទ្ធិ ក៏បាន​ពន្យល់ប្រាប់ប្រជាពលរដ្ឋ​ដែល​បានចូលរួម​ឱ្យ​បានយល់​ពី​គុណប្រយោជន៍នៃ​រោងចក្រអគ្គិសនីនេះ ហើយ​មុន​នឹង​សាងសង់​រោងចក្រនេះ​ក្រុមហ៊ុន​បាន​សិក្សាផល​ប៉ះពាល់​បរិស្ថានច្បាស់លាស់ហើយ។
លើសពីនេះទៅទៀត នៅថ្ងៃនេះគឺ​ជាថ្ងៃ​ទូទាត់​សំណងគោលនយោបាយ​ ជូនប្រជាពលរដ្ឋដែលរងផលប៉ះពាល់ដោយសារគម្រោងរោងចក្រអគ្គិសនីនេះតែម្តង។ សំណងនោះគឺ​គិតរួម​បញ្ចូល​ទាំង​ដីធ្លី ដើមឈើ ដើមឈើហូបផ្លែ ផ្ទះសម្បែង…។