រដ្ឋបាលខេត្តកោះកុង

ក្រុមអធិការកិច្ចខណ្ឌរដ្ឋបាលជលផលកោះកុង បានចេញប្រតិបត្តិការត្រួតពិនិត្យបទល្មើសជលផលក្នុងដែនសមុទ្រឃុំថ្មស ស្រុកបូទុមសាគរ ខេត្តកោះកុង ប្រទះឃើញទូកយន្តចំនួន ០២គ្រឿង កំពុងធ្វើសកម្មភាពនេសាទដោយឧបករណ៍លបកន្ទុយកណ្តុរ ឬលបប្រើស១០០ ឬលបពោះវៀនជ្រូក ជាឧបករណ៍នេសាទដែលគ្មានកំណត់ក្នុងប្រកាសរបស់រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ។

ក្រុមការងារបានឃាត់ចាប់ និងនាំយកទូកយន្តទាំង ០២គ្រឿងនោះមកស្នាក់ការផ្នែករដ្ឋបាលជលផលបូទុមសាគរ ដើម្បីអនុវត្តតាមសារាចរលេខ ០២៧ របស់ក្រសួងកសិកម្ម រុក្ខាប្រមាញ់ និងនេសាទ ក្នុងនោះ៖ ១.ធ្វើកិច្ចសន្យាបឱ្យបញ្ឈប់ការប្រើឧបករណ៍នេសាទខុសច្បាប់ចំនួន ០២ករណី លើមនុស្សចំនួន ០៤នាក់ ដែលជាម្ចាស់ទូកនេសាទ និងកម្មករទូកនេសាទ។ ២-ដកហូតឧបករណ៍នេសាទខុសច្បាប់ លបកន្ទុយកណ្តុរ ឬលបប្រើស១០០ ចំនួន ៣១០ខ្សែរ ស្មើនឹងប្រវែង ២ ៤៨០ម៉ែត្រ។

ចំពោះករណីលបកន្ទុយកណ្តុរ ឬលបប្រើស១០០ មានចំនួនដូចខាងលើ ក្រុមការងារបានយកមករក្សាទុកនៅស្នាក់ការផ្នែករដ្ឋបាលជលផលបូទុមសាគរ ដោយរង់ចាំធ្វើការបំផ្លាញចោលនៅពេលក្រោយ។

ថ្ងៃសៅរ៍ ៧រោច ខែអាសាឍ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២៧ ខែកក្កដា ឆ្នាំ២០២៤

ប្រភព ៖ មន្ទីរកសិកម្ម រុក្ខាប្រមាញ់ និងនេសាទខេត្តកោះកុង