រដ្ឋបាលខេត្តកោះកុង

កញ្ញា ផាន់ សម្ផស្ស ប្រធានការិយាល័យក្សេត្រសាស្រ្ត និងផលិតភាពកសិកម្ម បានដឹកនាំកញ្ញា ធិញ រចនា មន្ត្រីការិយាល័យ និងលោក សួន ណន មន្រ្តីជាប់កិច្ចសន្យា សហការជាមួយអាជ្ញាធរមូលដ្ឋាន មន្ត្រីការិយាល័យកសិកម្ម ធនធានធម្មជាតិ និងបរិស្ថានស្រុកបូទុមសាគរ និងមន្ត្រីកសិកម្មឃុំ ចុះពិនិត្យស្ថានភាពដំណាំស្រូវដែលរងផលប៉ះពាល់ដោយដង្កូវបំពង់កាត់ស្លឹក របស់កសិករបន្ទាប់ពីបានផ្តល់ថ្នាំបាញ់រួច និងតាមដានដំណាំស្រូវវស្សារបស់កសិករ ក្នុងស្រុកបូទុមសាគរ ខេត្តកោះកុង មានដូចខាងក្រោម៖

១. នៅភូមិកណ្ដោល និងភូមិធ្នង់ ក្នុងឃុំកណ្ដោល ស្រុកបូទុមសាគរ សង្កេតឃើញស្រូវលូតលាស់ល្អឡើងវិញទាំងស្រុងហើយ។

២. នៅភូមិជីមាល, ភូមិប្រៃ និងភូមិជីត្រេះ នៅឃុំអណ្ដូងទឹក ស្រុកបូទុមសាគរ ជាលទ្ធផលពិនិត្យឃើញថា នៅភូមិជីមាល ស្រូវមានវត្តមានពពួកសត្វមមាច ជញ្ជក់ស្រទាប់ស្លឹក។

     + បានណែនាំ ៖

• ឱ្យកសិករធ្វើការដាក់ជីបំប៉នបន្ថែម
• ត្រូវចុះពិនិត្យមើលស្រែជាប្រចាំ យើងអាចដឹងពីវត្តមាននៃពួកមមាចត្នោត និងងាយស្រួលក្នុងការចាត់វិធានការកម្ចាត់
• ត្រូវប្រើប្រាស់ជីអាសូតអោយបានសមស្របទៅតាមដំណាក់កាលលូតលាស់របស់ស្រូវ
• ភ្ជួរដីហាលបន្ទាប់ពីប្រមូលផលរួច
• មិនត្រូវសាប ព្រោះ ឬស្ទូងញឹកពេក
• ត្រូវពន្លិចទឹកក្នុងស្រែ រួចប្រើស្បៃមុងអូសប្រមូលមមាចត្នោតយកទៅកម្ទេចចោល
• ចំពោះស្រែដែលអាចបញ្ចេញបញ្ចូលទឹកបាន យើងអាចប្រើប្រេងម៉ាស៊ូតលាយជាមួយដីខ្សាច់បាចទៅក្នុងផ្ទៃស្រែរួចយកមែកឈើ ឬបន្ទះឫស្សីវាត់ដើមស្រូវដើម្បីទម្លាក់មមាចត្នោត ជាតិប្រេង និងបិទរន្ធដង្ហើមរបស់មមាចត្នោតធ្វើអោយឆាប់ងាប់
• បានផ្តល់ថ្នាំ និងរបៀបប្រើថ្នាំកសិកម្មអោយបានត្រឹមត្រូវតាមបច្ចេកទេស
• រាយការណ៍ ករណីបញ្ហាកើតឡើងដល់អាជ្ញាធរមូលដ្ឋាន ក៏ដូចជាមន្ត្រីកសិកម្មឃុំ ដើម្បីដោះស្រាយទាន់ពេលវេលា។

ថ្ងៃពុធ ៤រោច ខែស្រាពណ៍ ឆ្នាំម្សាញ់ សប្តស័ក ព.ស ២៥៦៩ ត្រូវនឹងថ្ងៃទី១៣ ខែសីហា ឆ្នាំ២០២៥

ប្រភព ៖ មន្ទីរកសិកម្ម រុក្ខាប្រមាញ់ និងនេសាទខេត្តកោះកុង