រដ្ឋបាលខេត្តកោះកុង

លោកស្រី ឈី វ៉ា អភិបាលរង នៃគណៈអភិបាលខេត្តកោះកុង បានអញ្ជើញស្វាគមន៍ ឯកឧត្តម ម៉ន គ្រីយ៉ា រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ ក្នុងពិធីអប់រំសុខភាពពិគ្រោះ ពិនិត្យ ធ្វើអនាម័យកុមារា ចំនួន៦០ នាក់ និងព្យាបាលជំងឺទូទៅដោយឥតគិតថ្លៃ ព្រមទាំងចែកកញ្ចប់អាហារ ចំនួន ២០០គ្រួសារ ក្រុងខេមរភូមិន្ទ និងស្រុកមណ្ឌលសីមា។

លោកស្រីអភិបាលរងខេត្ត បានលើកឡើងថា ថ្ងៃនេះជំនួសមុខ លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង និងក្នុងនាមនាងខ្ញុំផ្ទាល់ពិតជាមានសេចក្តីសោមនស្សរីករាយ ដែលបានអញ្ជើញ ចូលរួម ពិធីអប់រំសុខភាព ពិគ្រោះ ពិនិត្យ ធ្វើអនាម័យកុមារា ចំនួន៦០ នាក់ និងព្យាបាល ជំងឺទូទៅដោយឥតគិតថ្លៃ ព្រមទាំងចែកកញ្ចប់អារហារ ជូនដល់ប្រជាពលរដ្ឋ ដែលកំពុងមាន ជីវភាពខ្វះខាត ចំនួន ២០០ គ្រួសារ មកពីក្រុងខេមរភូមិន្ទ និងស្រុកមណ្ឌលសីមា នាពេលនេះ។
ក្នុងឱកាសនេះ ក្នុងនាមអាជ្ញាធរខេត្ត នាងខ្ញុំសូមថ្លែងអំណរគុណ ឯកឧត្តម ម៉ន គ្រីយ៉ា រដ្ឋលេខាធិការ ក្រសួងការងារ និងបណ្តុះបណ្តាលវិជ្ជាជីវៈ ដែលបានបានរៀបចំពិធីនេះឡើង ដើម្បីជួយឧបត្ថម្ភគាំទ្រ ដល់បងប្អូនប្រជាពលរដ្ឋដែលកំពុងជួបប្រទះនូវជីវភាពខ្វះខាត និងសូមកោតសរសើរចំពោះ ក្រុមគ្រូពេទ្យស្ម័គ្រចិត្ត ដែលបានលះបង់ពេលវេលា និងជំនាញ ដើម្បីធ្វើការអប់រំសុខភាព ពិគ្រោះ ពិនិត្យ ធ្វើអនាម័យកុមារា នាពេលនេះ។ សកម្មភាព និងអំណោយមនុស្សធ៌មខាងលើនេះគឺជាគុណតម្លៃដ៏ថ្លៃថ្លា សម្រាប់បងប្អូនប្រជាពលរដ្ឋ និងអាជ្ញាធរមូលដ្ឋាននៅទីនេះ ដែលបានចូលរួមសម្រាលការលំបាក របស់ ប្រជាពលរដ្ឋ ស្របតាមគោលនយោបាយ របស់រាជរដ្ឋាភិបាលកម្ពុជា ដែលបាននិងកំពុងយកចិត្តទុកដាក់ជាខ្លាំង និងបានដាក់ចេញនូវកម្មវិធីមួយចំនួន ដូចជាការអនុវត្តកម្មវិធី ឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះក្នុងអំឡុងពេលប្រយុទ្ធនឹងជំងឺកូវីដ-១៩ កម្មវិធីឧបត្ថម្ភសាច់ប្រាក់ ជូនស្ត្រីមានផ្ទៃពោះនិងកុមារអាយុក្រោម២ឆ្នាំ និងកម្មវិធីឧបត្ថម្ភសាច់ប្រាក់ ជូនគ្រួសារងាយរងហានិភ័យ ក្នុងអំឡុងពេលមានសម្ពាធអតិផរណា សម្រាប់ជួយសម្រួលដល់បងប្អូនប្រជាពលរដ្ឋ ដែលកំពុងជួបប្រទះនូវជីវភាពខ្វះខាត និងបានជួយសម្រាលនូវការលំបាក របស់ប្រជាពលរដ្ឋ រាប់ម៉ឺនគ្រួសារ នៅទូទាំងប្រទេស។ដោយឡែកថ្ងៃនេះ សមាគមសម្ព័ន្ធយុវជនមុស្លីមកម្ពុជាខេត្តកោះកុង បាននាំមកនូវ អំណោយ ជូនប្រជាពលរដ្ឋ ដែលកំពុងមានជីវភាពខ្វះខាត ចំនួន ២០០គ្រួសារ មកពីក្រុងខេមរភូមិន្ទ និងស្រុកមណ្ឌលសីមា ខេត្តកោះកុង នឹងរៀបចំអប់រំសុខភាព ពិគ្រោះ ពិនិត្យ ធ្វើអនាម័យកុមារា និងព្យាបាលជំងឺទូទៅដោយឥតគិតថ្លៃ ដែលជាការគាំទ្រពីសប្បុរសជន មកពីប្រទេសម៉ាឡេស៊ី ហើយកន្លងមកតែងតែបានផ្តល់ជាការឧបត្ថម្ភគ្រឿងកញ្ចប់អាហារ រ៉ម៉ាឌណ សាលារៀន លំនៅដ្ឋាន ព្រះវិហារជាដើម………។នាងខ្ញុំសង្ឃឹមថាសមាគមសម្ព័ន្ធយុវជនមុស្លីមកម្ពុជាខេត្តកោះកុង នឹងខិតខំកៀរគរ សប្បុរសជន នៃប្រទេសម៉ាឡេស៊ី បន្ថែមទៀត ដើម្បីចូលរួមចំណែកក្នុងការងារមនុស្សធម៌នេះ ហើយនាងខ្ញុំសង្ឃឹមថាបងប្អូនប្រជាពលរដ្ឋផ្សេងៗទៀត នឹងមានឱកាសទទួលបានអំណោយ ជាបន្តបន្ទាប់នាពេលខាងមុខ។មុននឹងបញ្ចប់ និងជាថ្មីម្តងទៀត នាងខ្ញុំសូមគោរពថ្លែងអំណរគុណ ឯកឧត្តម ម៉ន គ្រីយ៉ា ឯកឧត្តម លោកជំទាវ លោក លោកស្រីទាំងអស់ ដែលបានឆ្លៀតពេលដ៏មមាញឹក ដែលបានអញ្ជើញចូលរួម ក្នុងពិធីអប់រំសុខភាព ពិគ្រោះ ពិនិត្យ ធ្វើអនាម័យកុមារា និងព្យាបាលជំងឺទូទៅដោយឥតគិតថ្លៃ ព្រមទាំងចែកកញ្ចប់អាហារនាពេលនេះ។ ជាទីបញ្ចប់ នាងខ្ញុំសូមគោរពជូនពរ អង្គពិធីទាំងមូលសូមជួបតែនឹងព្រះពុទ្ធពរទាំង បួនប្រការគឺ អាយុ វណ្ណៈ សុខៈ និងពលៈ និងសូមជួបតែស្លាម៉ាត់ រ៉ស់ម៉ាត់ ពើរកាត់ និងជ័យជំនះគ្រប់ភារកិច្ចពីអល់ឡោះ ជាអស់ម្ចាស់ កុំប៏ឃ្លៀងឃ្លាតឡើយ។ សូមអរគុណ !ថ្ងៃអាទិត្យ ៥រោច ខែភទ្របទ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២២ ខែកញ្ញា ឆ្នាំ២០២៤ September 22, 2024