រដ្ឋបាលខេត្តកោះកុង

លោកជំទាវ ឈី វ៉ា អភិបាល នៃគណៈអភិបាលខេត្ត និងជាប្រធានគណៈបញ្ជាការឯកភាពរដ្ឋបាលខេត្តកោះកុង បានអញ្ជើញជាអធិបតីក្នុងពិធីផ្សព្វផ្សាយអនុក្រឹត្យលេខ ០៣ អនក្រ.បក ចុះថ្ងៃទី៥ ខែមករា ឆ្នាំ២០២៦ របស់រាជរដ្ឋាភិបាលកម្ពុជា ស្តីពីការគ្រប់គ្រងសន្តិសុខ សុវត្ថិភាពតាមទីតាំងរស់នៅប្រមូលផ្តុំ និងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ជូនដល់ម្ចាស់ និងតំណាងក្រុមហ៊ុន អាជីវកម្ម សណ្ឋាគារ ផ្ទះសំណាក់ តំបន់សេដ្ឋកិច្ចពិសេស វារីអគ្គិសនី និងម្ចាស់ទីតាំងរស់នៅប្រមូលផ្តុំ។
ក្នុងឱកាសនោះ លោកជំទាវអភិបាលខេត្ត បានលើកឡើងថា អនុក្រឹត្យ និងច្បាប់ខាងលើ គឺជាឧបករណ៍ច្បាប់ដ៏សំខាន់ ក្នុងការពង្រឹងប្រសិទ្ធភាពនៃការគ្រប់គ្រងសន្តិសុខ សុវត្ថិភាព និងសណ្តាប់ធ្នាប់សាធារណៈ ព្រមទាំងការការពារប្រជាពលរដ្ឋពីហានិភ័យនានា។ ការផ្សព្វផ្សាយនេះ មិនមែនគ្រាន់តែជាការស្តាប់ខ្លឹមសារច្បាប់ប៉ុណ្ណោះទេ ប៉ុន្តែជាការបង្កើនការយល់ដឹង ដើម្បីឱ្យអ្នកពាក់ព័ន្ធទាំងអស់ យកចំណេះដឹងទៅអនុវត្តជាក់ស្តែងឱ្យបានត្រឹមត្រូវ និងមានប្រសិទ្ធភាព។
លោកជំទាវអភិបាលខេត្ត បានបន្តថា ចំពោះការពង្រឹងសន្តិសុខ និងសុវត្ថិភាពតាមទីតាំងរស់នៅប្រមូលផ្តុំ ដូចជា រោងចក្រ បុរី លំនៅឋាន អគារស្នាក់នៅ ផ្ទះជួល ខុនដូ និងទីតាំងផ្សេងៗ អ្នកពាក់ព័ន្ធត្រូវយកចិត្តទុកដាក់លើការបង្ការ និងទប់ស្កាត់បទល្មើស ការរំខានសណ្តាប់ធ្នាប់ ការប្រើប្រាស់ទីតាំងខុសច្បាប់ ការបង្កហានិភ័យអគ្គិភ័យ និងហានិភ័យផ្សេងៗ ដែលអាចប៉ះពាល់ដល់អាយុជីវិត ទ្រព្យសម្បត្តិ និងសុវត្ថិភាពរបស់ប្រជាពលរដ្ឋ។ ជាមួយគ្នានេះ ត្រូវពង្រឹងកិច្ចសហការរវាងអាជ្ញាធរ ម្ចាស់ទីតាំង អ្នកគ្រប់គ្រង អ្នករស់នៅ និងកងកម្លាំងមានសមត្ថកិច្ច ដោយប្រកាន់ខ្ជាប់គោលការណ៍ បង្ការមុនកើតហេតុ ឆ្លើយតបបានទាន់ពេលវេលា និងដោះស្រាយដោយស្របច្បាប់។
ក្នុងរយៈពេលថ្មីៗនេះ បទល្មើសឆបោកតាមប្រព័ន្ធបច្ចេកវិទ្យា បានក្លាយជាបញ្ហាដ៏ធ្ងន់ធ្ងរ ដែលបង្កការខាតបង់ផលប្រយោជន៍ប្រជាពលរដ្ឋ និងប៉ះពាល់ដល់សន្តិសុខសេដ្ឋកិច្ច សណ្តាប់ធ្នាប់សង្គម។ បទល្មើសនេះ អាចកើតឡើងតាមរយៈការហៅទូរស័ព្ទ សារជាអក្សរ បណ្តាញសង្គម កម្មវិធីទំនាក់ទំនង គេហទំព័រ គណនីក្លែងក្លាយ ការផ្សព្វផ្សាយព័ត៌មានមិនពិត ដើម្បីបញ្ឆោតឱ្យជនរងគ្រោះផ្តល់ព័ត៌មានផ្ទាល់ខ្លួន លេខកូដសម្ងាត់ លេខគណនី ឬការសម្អាតប្រាក់។
ទាក់ទងនឹងបញ្ហានេះ លោកជំទាវអភិបាលខេត្ត បានអំពាវនាវដល់ប្រជាពលរដ្ឋ ជាពិសេសមន្ត្រីរាជការ ឱ្យបង្កើនការប្រុងប្រយ័ត្នខ្ពស់ និងចងចាំគោលការណ៍ «គិតមុនចុច គិតមុនផ្ទេរ គិតមុនជឿ»។ ជាពិសេស មិនត្រូវផ្តល់ព័ត៌មានសម្ងាត់ ឬព័ត៌មានហិរញ្ញវត្ថុ ទៅឱ្យអ្នកមិនស្គាល់ និងមិនត្រូវចុចលើតំណភ្ជាប់ ឬទាញយកកម្មវិធីដែលមានប្រភពមិនច្បាស់លាស់។ ប្រសិនបើមានការសង្ស័យថា ខ្លួនឯង ឬអ្នកដទៃកំពុងរងគ្រោះ ត្រូវប្រញាប់ជូនដំណឹងទៅសមត្ថកិច្ច និងអាជ្ញាធរពាក់ព័ន្ធ ឱ្យបានទាន់ពេលវេលា។
លោកជំទាវអភិបាលខេត្ត ក៏បានបញ្ជាក់ថា ចំពោះម្ចាស់ទីតាំង បើមិនអនុវត្តតាមលិខិតបទដ្ឋានគតិយុត្តឱ្យបានត្រឹមត្រូវទេ គឺមិនមានការលើកលែងឡើយ នឹងត្រូវចាត់វិធានការផ្លូវច្បាប់ជាដាច់ខាត។ លោកជំទាវក៏បានអំពាវនាវឱ្យអ្នកពាក់ព័ន្ធទាំងអស់ ចៀសឱ្យឆ្ងាយពីការឃុបឃិត និងការលាក់បាំងជនប្រព្រឹត្តបទល្មើស កុំមើលឃើញតែផលប្រយោជន៍ផ្ទាល់ខ្លួន ហើយបំពានលើច្បាប់។
ក្នុងពិធីនេះ លោកជំទាវអភិបាលខេត្ត ក៏បានស្នើឱ្យអ្នកពាក់ព័ន្ធទាំងអស់ បន្តអនុវត្តអនុក្រឹត្យ និងច្បាប់ខាងលើឱ្យមានប្រសិទ្ធភាព និងជាក់ស្តែងនៅមូលដ្ឋាន ព្រមទាំងផ្សព្វផ្សាយបន្ត តាមរយៈការប្រជុំ វេទិកាសាធារណៈ ប្រព័ន្ធផ្សព្វផ្សាយ និងបណ្តាញសង្គម ដើម្បីឱ្យប្រជាពលរដ្ឋគ្រប់រូបបានយល់ដឹងពីសិទ្ធិ កាតព្វកិច្ច និងវិធានការការពារខ្លួន៕
ថ្ងៃព្រហស្បតិ៍ ៦កើត ខែភទ្របទ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៧ ខែកញ្ញា ឆ្នាំ២០២៦