លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញស្វាគមន៍ឯកឧត្តម លេង វី រដ្ឋលេខាធិការក្រសួងមហាផ្ទៃ តំណាងដ៏ខ្ពង់ខ្ពស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក្នុងពិធីប្រកាសចូលកាន់មុខតំណែងអភិបាលរង នៃគណៈអភិបាលខេត្តកោះកុង។

លោកជំទាវអភិបាលខេត្ត សូមគោរពថ្លែងអំណរគុណឯកឧត្តម លេង វី រដ្ឋលេខាធិការក្រសួងមហាផ្ទៃ ដែលបានចំណាយពេលដ៏មានតម្លៃ បានអញ្ជើញ ជាអធិបតី ក្នុងពិធីប្រកាសចូលកាន់តំណែងអភិបាលរងខេត្តនាពេលនេះ។ ជាមួយគ្នានេះផងដែរ នាងខ្ញុំក៏សូមចូលអបអរសាទរ លោក សំឃិត វៀន និងលោក ឃឹម ច័ន្ទឌី ដែលត្រូវបានថ្នាក់ដឹកនាំក្រសួងមហាផ្ទៃ និងរាជរដ្ឋាភិបាល សម្រេចតែងតាំងជាអភិបាលរងខេត្តនាពេលនេះ នាងខ្ញុំសង្ឃឹមយ៉ាងមុតមាំថា លោកទាំងពីរ ពិតជាពាំនាំបទពិសោធន៍ សមត្ថភាព និងចំណេះដឹងល្អៗ ដែលបានអនុវត្តកន្លងមក ដើម្បីចូលរួមដឹកនាំ ចាត់ចែងការងាររបស់រដ្ឋបាលខេត្តកោះកុង ឱ្យទទួលបានជោគជ័យ និងសមស្របទៅនឹងច្បាប់ លិខិតបទដ្ឋានគតិយុត្តនានា៕