សាខា កក្រក ខេត្តកោះកុង ៖ នៅថ្ងៃព្រហ្បត្តិ៍ ១០កើត ខែស្រាពណ៍ ឆ្នាំជូត ទោស័ក ព.ស២៥៦៤ ត្រូវនឹងថ្ងៃទី៣០ ខែកក្កដា ឆ្នាំ២០២០ ក្រោយពីទទួលបានរបាយការណ៍ស្នើសុំជួសជុលផ្ទះ ០១ខ្នង ជូនគ្រួសារស្ត្រីមេម៉ាយជួបការលំបាកក្នុងជីវភាពប្រចាំថ្ងៃ របស់អាជ្ញាធរឃុំថ្មស តាមរយៈអនុសាខាកាកបាទក្រហមកម្ពុជា ស្រុកបូទុមសាគរ លោកជំទាវ មិថុនា ភូថង ប្រធានគណៈកម្មាធិការ សាខាកាកបាទក្រហមកម្ពុជា ខេត្តកោះកុង បានចាត់អោយ លោក ឡុច ភិរ័ក្ស នាយករងសាខា ដឹកនាំក្រុមប្រតិបត្តសាខា សហការជាមួយក្រុមការងារអនុសាខាកាកបាទក្រហមកម្ពុជា ស្រុកបូទុមសាគរ ដឹកនាំដោយ លោកស្រី អ៊ិន សោភ័ណ្ឌ អនុប្រធានគណៈកម្មាធិការអនុសាខា រួមជាមួយអាជ្ញាធរឃុំថ្មស បានចុះទៅពិនិត្យផ្ទាល់ដល់ទីតាំងផ្ទះគ្រួសារស្ត្រីមេម៉ាយ ឈ្មោះ ប្រាង ទឹម អាយុ៥៥ឆ្នាំ មានកូនស្រី៣នាក់ ក្នុងបន្ទុកគ្រួសារ ប្រកបមុខរបរលក់នំ តិចតួចដើម្បីចិញ្ចឹមជីវិតប្រចាំថ្ងៃ រស់នៅភូមិថ្មស ឃុំថ្មស ស្រុកបូទុមសាគរ ខេត្តកោះកុង ដែលផ្ទះរបស់គាត់មានសភាពចាស់ទ្រុឌទ្រោម ពុំមានលទ្ធភាពក្នុងការជួសជុល ងាយនឹងប្រឈមនឹងគ្រោះថ្នាក់ដួលរលំនៅថ្ងៃណាមួយ ដូចនេះក្រុមការងារបានចុះទៅពិនិត្យ ដើម្បីសិក្សាប៉ាន់ប្រមាណត្រៀមជួសជុលឡើងថ្មី ជូនគ្រួសារពួកគាត់។