មន្ទីរកសិកម្ម រុក្ខាប្រមាញ់ និងនេសាទខេត្តកោះកុង ៖ ចុះពិនិត្យ វាយតម្លៃពីផលប៉ះពាល់ និងធ្វើការអន្តរាគមន៍ភ្លាមៗ ដើម្បីចាត់វិធានការការពារ ទប់ស្កាត់ និងកម្ចាត់ដង្កូវហ្វូង ឱ្យបានទាន់ពេលវេលា នៅក្នុងស្រុកស្រែអំបិល ខេត្តកោះកុង
លោកស្រីអនុប្រធានមន្ទីរទទួលបន្ទុករួម បានចាត់មន្រ្តីជំនាញក្រោមឱវាទនៃមន្ទីរកសិកម្ម រុក្ខាប្រមាញ់ និងនេសាទខេត្តកោះកុង ចំនួន ០៤រូប សហការជាមួយការិយាល័យកសិកម្ម ធនធានធម្មជាតិ និងបរិស្ថានស្រុកស្រែអំបិល និងអាជ្ញាធរភូមិ ឃុំ បានចុះពិនិត្យ វាយតម្លៃពីផលប៉ះពាល់ និងធ្វើការអន្តរាគមន៍ភ្លាមៗ ដើម្បីចាត់វិធានការការពារ ទប់ស្កាត់ និងកម្ចាត់ដង្កូវហ្វូង ឱ្យបានទាន់ពេលវេលា នៅស្រុកស្រែអំបិល ខេត្តកោះកុង។
ក្នុងនោះមានឃុំចំនួន ០៤ឃុំ រងផលប៉ះពាល់ដោយដង្កូវហ្វូង មានដូចខាងក្រោម៖
១.ឃុំជីខក្រោម មានចំនួន ០១ភូមិ ដែលមានប្រជាជន ៤៦គ្រួសារ រងផលប៉ះពាល់លើផ្ទៃដី ចំនួន ៦៦,៥ហិកតា
២.ឃុំជីខលើ មានចំនួន ០៤ភូមិ ដែលមានប្រជាជន ១៦៥ គ្រួសារ រងផលប៉ះពាល់លើផ្ទៃដី ចំនួន ១១៣ហិកតា
៣.ឃុំដងពែង មានចំនួន ០២ភូមិ ដែលមានប្រជាជន ៧៤គ្រួសារ រងផលប៉ះពាល់លើផ្ទៃដី ចំនួន ៤៧ហិកតា
៤.ឃុំបឹងព្រាវ មានចំនួន ០១ភូមិ ដែលមានប្រជាជន ២៦គ្រួសារ រងផលប៉ះពាល់លើផ្ទៃដី ចំនួន ១២ហិកតា។
ក្នុងកិច្ចអន្តរាគមន៍នេះផងដែរ មន្ត្រីជំនាញបានពន្យល់ណែនាំអំពីនិតិវិធីដូចខាងក្រោម៖
១.ចំពោះស្រែដែលមានទឹកច្រើនត្រូវយកបន្លាស្អិតអូសអោយដង្កូវធ្លាក់ក្នុងទឹក ហើយយកស្បៃមុងអូសប្រមូលដង្កូវយកទៅកម្ទេចចោល,
២.ណែនាំពីរបៀបប្រើប្រាស់ថ្នាំកសិកម្ម និងសម្ភារៈប្រើប្រាស់ក្នុងពេលបាញ់ថ្នាំកសិកម្ម។
ជាលទ្ធផលប្រជាកសិករ និងមន្ត្រីជំនាញបានចុះអន្តរាគមន៍បានប្រមាណជា ៨០% នៃផលប៉ះពាល់ទាំងអស់ដែលកើតមានក្នុងស្រុកទាំងមូល ក្នុងរយៈពេល ០២ថ្ងៃ ចាប់ពីថ្ងៃទី២៦-២៧ ខែមិថុនា ឆ្នាំ២០២៤។
ថ្ងៃព្រហស្បតិ៍ ៦រោច ខែជេស្ឋ ឆ្នាំរោង ឆស័ក ព.ស ២៥៦៨ ត្រូវនឹងថ្ងៃទី២៧ ខែមិថុនា ឆ្នាំ២០២៤
ប្រភព ៖ មន្ទីរកសិកម្ម រុក្ខាប្រមាញ់ និងនេសាទខេត្តកោះកុង
