គណៈបញ្ជាការឯកភាពរដ្ឋបាលខេត្តកោះកុង ដឹកនាំកម្លាំងចុះល្បាតចាប់ឃាត់ខ្លួនក្មេងទំនើងចំនួន ០៥នាក់ រួមជាមួយនឹងសម្ភារបង្កគ្រោះថ្នាក់ កញ្ឆា និងសម្ភារមួយចំនួនទៀត។

ក្រោយពីមានការណែនាំដ៏ខ្ពង់ខ្ពស់របស់លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង និងជាប្រធានគណៈបញ្ជាការឯកភាពរដ្ឋបាលខេត្ត បានចាត់លោក ហាក់ ឡេង អភិបាលរងខេត្ត និងជាអនុប្រធានអចិន្ត្រៃយ៍គណៈបញ្ជាការឯកភាពរដ្ឋបាលខេត្ត បានដឹកនាំកម្លាំងគណៈបញ្ជាការឯកភាពរដ្ឋបាលខេត្ត សហការជាមួយកម្លាំងគណៈបញ្ជាការឯកភាពរដ្ឋបាលក្រុងខេមរភូមិន្ទ ចុះល្បាតក្នុងភូមិសាស្រ្តក្រុងខេមរភូមិន្ទ ចាប់ឃាត់ខ្លួនក្មេងទំនើងចំនួន ០៥នាក់ ដកហូតបានដែកឆាប កញ្ឆា បារីអេឡិចត្រូនិច និងសម្ភារមួយចំនួន និងនាំយកទៅសួរនាំនៅអធិការដ្ឋាននគរបាលក្រុងខេមរភូមិន្ទ។     

ហេតុការណ៍នេះ បានធ្វើឡើងនៅវេលាម៉ោង ប្រហែល ១០និង២០នាទីយប់ថ្ងៃទី១១ ខែមិថុនាឆ្នាំ២០២៤ នៅចំណុចសួនច្បារមុខសាលាបឋមសិក្សា ទីរួមខេត្ត ស្ថិតក្នុងភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
ថ្ងៃពុធ ៦ កើត ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី១២ ខែមិថុនា ឆ្នាំ២០២៤ June 12, 2024