(កោះកុង) នៅថ្ងៃទី០៨ ខែមីនា ឆ្នាំ២០២៤ នៅទីបញ្ជាការតំបន់ប្រតិបត្តិការសឹករងកោះកុង បានប្រារព្ធពិធីអបអរសាទរខួបលើកទី១១៣ ទិវានារីអន្តរជាតិ ៨ មីនា ឆ្នាំ២០២៤ ក្រោមមូលបទ«ស្រ្តី និងក្មេងស្រី ក្នុងបរិវត្តកម្មឌីជីថល» ។
ក្នុងឱកាសនោះដែរ លោកមេបញ្ជាការកងពល បានមានប្រសាសន៍ថា ទិវាអន្តរជាតិនារី ៨ មីនា គឺដើម្បីរំលឹកពីការតស៊ូទាមទារសិទ្ធិ សេរីភាព និងឆ្លុះបញ្ចាំងអំពីវឌ្ឍនភាព សមិទ្ធផល បញ្ហាប្រឈម ការប្តេជ្ញាចិត្ត និងវិធានការសំខាន់ៗ ក្នុងគោលបំណងបង្កើនភាពអង់អាចរបស់ស្ត្រី និងដើម្បីឈានទៅសម្រេចបាន នូវសមភាពយេនឌ័រ។
ជាពិសេស ដេីម្បីបញ្ជាក់យ៉ាងច្បាស់ អំពីសារៈសំខាន់របស់ស្ត្រី ក្នុងការរក្សាសុខសន្តិភាព និងការអភិវឌ្ឍន៍សេដ្ឋកិច្ច និងសង្គមជាតិនាពេលកន្លងមក។
ក្នុងនោះដែរស្រ្តីក៏បានចូលរួមចំណែកយ៉ាងសកម្មផងដែរ ក្នុងកិច្ចការ អនុវត្តន៍កម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលអាណត្តិទី៧ បានយ៉ាងល្អ។
ក្នុងពិធីសំណេះសំណាលនេះដែរ លោកមេបញ្ជាការបានឧបត្ថម្ភ ជូនយោធិននារីទាំង៣៥ រូប ដោយម្នាក់ៗទទួលបានក្រណាត់សម្រាប់កាត់សម្លៀកបំពាក់ ០១សម្រាប់ កន្សែងពោះគោ ០១ និងថវិកា ៥០.០០០រៀល ផងដែរ។
ជាចុងបញ្ចប់ លោកឧត្តមសេនីយ៍ត្រី កែវ វិចិត្រ បានថ្លែងអំណរគុណ និងកោតសរសេីរ ដល់យោធិននារីទាំងអស់ ដែលបានខិតខំប្រឹងប្រែងអស់ពីកំលាំងកាយចិត្ត ប្រាជ្ញា ស្មារតីប្រកបដោយភាពអំណត់ព្យាយាមពុះពារការលំបាក ដេីម្បីចូលរួមចំណែក ក្នុងបុព្វហេតុការពារឯករាជ្យជាតិ អធិតេយ្យភាពបូរណភាពដែនដី និងអភិវឌ្ឍន៍ជាតិមាតុភូមិបានយ៉ាងល្អប្រសេីរនាពេលកន្លងមក៕
