លោក អន សុធារិទ្ធ អភិបាលរង នៃគណៈអភិបាលខេត្តកោះកុង និងជាអនុប្រធានគណៈកម្មាធិការរៀបចំ និងគ្រប់គ្រងទីលានទុកដាក់សំរាម សំណល់រឹងទីប្រជុំជន ខេត្តកោះកុង បានដឹកនាំក្រុមការងារខេត្ត និងអាជ្ញាធរពាក់ព័ន្ធ ចុះជួបប្រជុំ និងពិនិត្យទីតាំងដីឡដុតសំរាម នៅឃុំកោះស្តេច ស្រុកគិរីសាគរ។
លោកអភិបាលរងខេត្ត បានស្នើឱ្យអាជ្ញាធរឃុំ ស្រុក នូវចំណុចមួយចំនួន ដូចខាងក្រោម ៖
១. ត្រូវរៀបចំសិក្សា ពិនិត្យផលប៉ះពាល់ និងចុះបញ្ជីដីដែលកំពុងប្រើសម្រាប់ឡដុតសំរាមនេះឱ្យបានលឿន
២. ឃុំនីមួយៗ ត្រូវពិនិត្យលទ្ធភាពជ្រើសរើសទីតាំងដីដែលមានទំហំសមស្រប ដើម្បីរៀបចំជាកន្លែងចាក់សំរាមក្នុងឃុំ
៣. ទីតាំងដីនៅឃុំព្រែកខ្សាច់ ដែលរដ្ឋបាលស្រុកបានត្រៀមជាទីតាំងដីសម្រាប់ចាក់សំរាម ត្រូវរៀបចំចុះបញ្ជីឱ្យបានរួចរាល់ ដើម្បីរៀបចំគម្រោងជាទីលានទុកដាក់សំរាម សំណល់រឹងស្តង់ដាររបស់ស្រុកគិរីសាគរ
៤. រដ្ឋបាលស្រុក និងឃុំកោះស្តេច ត្រូវសិក្សា និងពិនិត្យលទ្ធភាពរកទីតាំងដី ឫទីតាំងសមស្របដើម្បីត្រៀមរៀបចំសាងសង់អាងប្រព្រឹត្តិកម្មទឹកកខ្វក់ លើកោះស្តេច
៥. រដ្ឋបាលស្រុក និងឃុំ ត្រូវផ្សព្វផ្សាយជាប្រចាំជូនដល់ប្រជាពលរដ្ឋ លើការគ្រប់គ្រងសំរាម សំណល់រឹង រាវ និងការញែកសំរាម ពិសេសសំរាមប្លាស្ទិច និងសំរាមវេជ្ជសាស្រ្ត៕
ថ្ងៃព្រហស្បតិ៍ ៧ កើត ខែភទ្របទ ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី២១ ខែកញ្ញា ឆ្នាំ២០២៣ September 21, 2023