លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញជាអធិបតី ក្នុងពិធីសំណេះសំណាល ជាមួយកីឡាករឈ្នះមេដាយមាស និងសំរឹទ្ធ ក្នុងព្រឹត្តិការណ៍ប្រកួតកីឡាស៊ីហ្គេម (Sea Games) ឆ្នាំ២០២២ ក្នុងប្រទេសវៀតណាម រួមជាមួយនឹងការដង្ហែក្បួនដេីម្បីអបអរសាទរដល់កីឡាករ ក្នុងខេត្តកោះកុង។
លោកជំទាវអភិបាលខេត្ត បានគូសបញ្ជាក់ ខ្ញុំពិតជាមានមោទនភាពចំពោះក្មួយៗជាកីឡាករ ដែលមានស្រុកកំណើតនៅខេត្តកោះកុងផ្ទាល់ ដែលទទួលបានមេដាយមាស និងសំរឹទ្ធ ក្នុងព្រឹត្តិការណ៍ប្រកួតកីឡាស៊ីហ្គេម (Sea Games) ឆ្នាំ២០២២ ក្នុងប្រទេសវវៀតណាម។ ប្រជាពលរដ្ឋនៅទូទាំងខេត្ត ពិតជាមានក្តីរំភើបរីករាយ ជាមួយក្មួយៗ ដែលជាកីឡាករទំងអស់ ដែលបានបង្ហាញសមត្ថភាពនៅលើឆាកអន្តរជាតិ ដែលនាំកិត្តិយសសម្រាប់ជាតិ និងប្រជាជនទាំងអស់។ សូមក្មួយៗ ជាកីឡាករទាំងអស់បន្តយកចិត្តទុកដាក់ក្នុងការហ្វឹកហាត់បន្តទៀត ដើម្បីចូលរួមសម្រាប់ជាម្ចាស់ផ្ទះនាឆ្នាំ២០២៣ខាងមុខ បន្តលើកមុខមាត់ខេត្តកោះកុងយើងបន្តទៀត និងបន្តជម្រុញលើកទឹកចិត្តដល់យុវជន ឱ្យចូលរួមលេងកីឡា ដើម្បីចូលរួមប្រកួតប្រជែងផង និងដើម្បីសុខភាពផង ជៀសវាងការប្រើប្រាស់គ្រឿងញៀន។
ថ្ងៃចន្ទ ៧ កើត ខែជេស្ឋ ឆ្នាំខាល ចត្វាស័ក ពុទ្ធសករាជ ២៥៦៦ ត្រូវនឹងថ្ងៃទី៦ ខែមិថុនា ឆ្នាំ២០២២ June 6, 2022