លោកជំទាវ មិថុនា ភូថង ប្រធានគណៈកម្មាធិការសាខា កាកបាទក្រហមកម្ពុជាខេត្តកោះកុង និងជាប្រធានក្រុមការងារឥស្សរជនឆ្នេីមថ្នាក់សាខា បានអញ្ជើញជួបសំណេះសំណាល ជាមួយអ្នករស់នៅជាមួយមេរោគអេដស៍ គ្រួសារចាស់ជរា សរុបចំនួន ៧០នាក់ និងអ្នកស្ម័គ្រចិត្តកាកបាទក្រហមចំនួន ២៥នាក់ នៅស្រុកស្រែអំបិល ខេត្តកោះកុង។
ដេីម្បីឈានឆ្ពោះទិវាពិភពលោកប្រយុទ្ធនឹងជំងឺអេដស៍ ១ធ្នូ ២០២១ ក្រោមប្រធានបទ «បញ្ចប់វិសមភាព បញ្ចប់អេដស៍ បញ្ចប់ជំងឺឆ្លងរាតត្បាតសកល» និងទិវាអន្តរជាតិ នៃអ្នកស្ម័គ្រចិត្ត៥ធ្នូ ២០២១ ក្រោមប្រធានបទ (ស្ម័គ្រចិត្តពេលនេះ ដើម្បីអនាគតរបស់យើង-ទាំងអស់គ្នាបន្តធ្វើសកម្មភាព ដដោយមិនឈប់ឈរឡើយ នៅថ្ងៃទី៩ ខែធ្នូ ឆ្នាំ២០២១នេះ លោកជំទាវ មិថុនា ភូថង ប្រធានគណៈកម្មាធិការសាខា កាកបាទក្រហមកម្ពុជាខេត្តកោះកុង និងជាប្រធានក្រុមការងារឥស្សរជនឆ្នេីមថ្នាក់សាខា សមាជិក សមាជិកា គណៈកម្មាធិការសាខា អនុសាខា បានអញ្ជេីញចុះជួបសំណេះសំណាល សួរសុខទុក្ខ និងចែកអំណោយដល់អ្នកផ្ទុកមេរោគអេដស៍ ចំនួន ៤០នាក់ គ្រួសារងាយរងគ្រោះ ចាស់ជរា ៣០នាក់ និងអ្នកស្ម័គ្រចិត្តកាកបាទក្រហមចំនួន ២៥នាក់ ដែលស្ថិតនៅ ឃុំស្រែអំបិល ស្រុកស្រែអំបិល ខេត្តកោះកុង។
ក្នុងឱកាសជួបសំណេះសំណាលនោះលោកជំទាវ មិថុនា ភូថង ប្រធានគណៈកម្មាធិការសាខា បានពាំនាំប្រសាសន៍របស់ឯកឧត្តម ប៊ុន លើត ប្រធានកិត្តិយសសាខា ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងជាឥស្សរជនឆ្នេីមថ្នាក់ជាតិ នៃវេទិកាភាពជាអ្នកដឹកនាំតំបន់អាស៊ី-ប៉ាស៊ីហ្វិក ឆ្លេីយតបមេរោគអេដស៍ ជំងឺអេដស៍ និងការអភិវឌ្ឍនៅកម្ពុជា និងជាឥស្សរជនឆ្នេីមថ្នាក់ជាតិ នៃផែនការសកម្មភាពរួមអគ្គលេខាធិការអង្គការសហប្រជាជាតិ ដេីម្បីសុខភាពស្ត្រីនិងកុមារ ដែលផ្តាំផ្ញេីសួរសុខទុក្ខ ក្តីនឹករលឹក និងមនោសញ្ចេតនាអាណិតស្រឡាញ់ចំពោះបងប្អូនទាំងអស់ ជាពិសេសពាំនាំនូវការកោតសរសេីរ និងថ្លែងអំណរគុណយ៉ាងជ្រាលជ្រៅចំពោះ អ្នកស្ម័គ្រចិត្តកាកបាទក្រហមដែលតែងតែចូលរួមគ្រប់សកម្មភាពមនុស្សធម៌កន្លងមកដោយមិនគិតពីការលំបាកផ្ទាល់ខ្លួន។ ទន្ទឹមនឹងនេះ លោកជំទាវ បានផ្តាំផ្ញេីដល់បងប្អូនទាំងអស់ ត្រូវស្រឡាញ់សុខភាពខ្លួន មនុស្សជាទីស្រឡាញ់ ជាពិសេសត្រូវរស់នៅមានអនាម័យ អនុវត្តឱ្យបានខ្ជាប់ខ្ជួននូវវិធាន «៣ការពារ និង៣កុំ» ដេីម្បីចូលរួមទប់ស្កាត់ការចម្លងវីរុសកូវីដ-១៩។
ជាមួយគ្នានោះផងដែរ លោកជំទាវ មិថុនា ភូថង ប្រធានគណៈកម្មាធិការសាខា បានផ្តល់ជូននូវសារលិខិត របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានអំពាវនាវដល់បងប្អូនជនរួមជាតិ សូមបន្តអនុវត្តនូវចំណុចសំខាន់ៗដូចខាងក្រោម ដើម្បីសុខុមាលភាពគ្រួសារ និងសង្គម ៖
១.សូមបងប្អូនប្រជាពលរដ្ឋ ក្មួយៗយុវជនយុវនារី សិក្សាស្វែងយល់ជាប្រចាំនូវចំណេះដឹងថ្មីៗ ស្តីពីការបង្ការការចម្លងមេរោគអេដស៍ ក្នុងគ្រួសារ សហគមន៍ និងសង្គមជាតិ ដើម្បីបញ្ចប់ជំងឺអេដស៍នៅឆ្នាំ២០២៥ ឱ្យបានតាមការគ្រោងទុក។
២.ក្នុងករណីសង្ស័យថា បានប្រឈមនឹងការឆ្លងមេរោគអេដស៍ ត្រូវស្វែងរកសេវាផ្តល់ប្រឹក្សា និងធ្វើតេស្តឈាមរកមេរោគអេដស៍ដោយស្ម័គ្រចិត្ត ដើម្បីទទួលបានសេវាថែទាំ និង ព្យាបាលទាន់ពេលវេលា។
៣.ចំពោះស្ត្រីមានផ្ទៃពោះ ត្រូវស្វែងរកសេវាថែទាំ និងពិនិត្យផ្ទៃពោះ ឱ្យបានត្រឹមត្រូវ និងទៀងទាត់តាមការណែនាំរបស់បុគ្គលិកពេទ្យ ទប់ស្កាត់ការចម្លងមេរោគអេដស៍ពីម្តាយទៅទារក ដើម្បីធានាសុខុមាលភាព ទាំងមាតា និងទារក។
៤.ត្រូវចូលរួមបញ្ចប់ការរើសអើងនូវគ្រប់រូបភាព ចំពោះអ្នកផ្ទុកមេរោគអេដស៍ និងជំងឺអេដស៍ ស្របតាមច្បាប់ស្តីពីការបង្ការ និងទប់ស្កាត់ការរីករាលដាលមេរោគអេដស៍ និងជំងឺអេដស៍នៅកម្ពុជា។
៥.ត្រូវការពារជាប្រចាំ តាមរយៈការប្រើស្រោមអនាម័យ ជាពិសេសចំពោះប្រជាពលរដ្ឋទាំងឡាយ ដែលមានមុខរបរប្រឈមខ្ពស់នឹងការឆ្លងមេរោគអេដស៍។
៦.ទន្ទឹមនឹងការយកចិត្តទុកដាក់ចំពោះមេរោគអេដស៍ និងជំងឺអេដស៍ សូមបងប្អូនប្រជាពលរដ្ឋយកចិត្តទុកដាក់ចំពោះជំងឺរាតត្បាតសកលកូវីដ-១៩ ហើយត្រូវការពារឱ្យបានខ្ជាប់ខ្ជួន រស់នៅតាមគន្លងប្រក្រតីភាពថ្មី ប្រកាន់ខ្ជាប់នូវវិធានការសុខាភិបាល «៣ការពារ ៣កុំ» ដើម្បីធានាសុខុមាលភាពគ្រួសារ សហគមន៍ និងសង្គមជាតិយើង។
ជាកិច្ចឆ្លេីយតប លោក ជា ច័ន្ទកញ្ញា តំណាង និងជំនួសមុខបងប្អូនទាំងអស់ សូមថ្លែងអំណរគុណយ៉ាងជ្រាលជ្រៅបំផុតចំពោះ លោកជំទាវ មិថុនា ភូថង ប្រធានគណៈកម្មាធិការសាខា ឯកឧត្តម ប៊ុន លើត ប្រធានកិត្តិយសសាខា សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានចុះ និងផ្តាំផ្ញើសួរសុខទុក្ខ និងនាំយកអំណោយជាច្រេីនមកផ្តល់ជូននាពេលនេះ។
កម្មវិធីនេះអនុសាខាក៏បានទទួលថវិកាឧបត្ថម្ភពី ១.លោកឧកញ៉ា ហេង ហ៊ុយ ចំនួន ៥លានរៀល
២.លោកឧកញ៉ា លឹម បុក ចំនួន ៥លានរៀល ព្រមទាំងសប្បុរសជនជាច្រើនទៀតផងដែរ
សូមបញ្ជាក់ថា អំណោយដែលសាខា និងអនុសាខាផ្តល់ជូនក្នុងម្នាក់ៗទទួលបាន ៖ អង្ករ ២៥គក្រ មី ១កេស ត្រីខ ១ឡូ ទឹកផ្លែឈើស្រស់ ១២កំប៉ុង ទឹកសុទ្ធឱរ៉ាល់១កេស ជេលលាងដៃ ១ដប ម៉ាស់ ៥សន្លឹក អាវយឺត ២អាវ ព្រមទាំងថវិកា ៨ម៉ឺនរៀលដូចៗគ្នា ។
ដោយឡែកអ្នកស្ម័គ្រចិត្តកាកបាទក្រហមក្នុងម្នាក់ៗទទួលបាន ៖ មួកសុវត្ថិភាព ១ ជេលលាងដៃ១ដប ម៉ាស់ ៥សន្លឹក អាវយឺត ១អាវ ព្រមទាំងថវិកាសាខា និងថវិកាលោកជំទាវមួយចំនួនផងដែរ ៕
ថ្ងៃព្រហស្បតិ៍ ៥ កើត ខែមិគសិរ ឆ្នាំឆ្លូវ ត្រីស័ក ពុទ្ធសករាជ ២៥៦៥
ត្រូវនឹងថ្ងៃទី៩ ខែធ្នូ ឆ្នាំ២០២១ December 9, 2021
