លោក សុខ សុទ្ធី អភិបាលរង នៃគណៈអភិបាលខេត្តកោះកុង ដោយមានការអនុញ្ញាត និងណែនាំពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានដឹកនាំកិច្ចប្រជុំ និងចុះពិនិត្យទីតាំងដីដែលប្រជាពលរដ្ឋឈ្មោះ កែវ ដារី, សួន សម្ផស្ស, លឹម គឹមលី, អឿន ជាប, សួន សម្បត្តិ, ឆឹង វាសនា, និង ឈ្មោះ ឆឹង គឹមណូ ដែលដាក់ពាក្យស្នើសូមចុះបញ្ជីធ្វើបណ្ណសម្គាស់សិទ្ធិកាន់កាន់អចលនវត្ថុ នៃដីស្ថិតនៅ ឃុំជ្រោយស្វាយ ស្រុកស្រែអំបិល ខេត្តកោះកុង។
ក្នុងកិច្ចប្រជុំពិនិត្យសំណើសូមចុះបញ្ជីដីនេះ លោក សុខ សុទ្ធី បានបញ្ជាក់ជូនអង្គប្រជុំថា ដីដែលអាចចុះបញ្ជី ជូនបាន លុះត្រាតែទីតាំងដីនោះជាដីគ្មានទំនាស់ មានការកាន់កាប់អាស្រ័យផងជាក់ស្តែង និងស្របតាមច្បាប់កំណត់ ហើយការចុះបញ្ជីដី គឺត្រូវគិតគូរទុកផ្លូវសាធារណៈ ចំណីព្រែក ស្ទឹង អូរ សមុទ្រ តាមច្បាប់កំណត់ ទៅតាមស្ថានភាពជាក់ស្តែងរបស់ទីតាំងដីនីមួយៗ៕