លោកស្រី អ៊ិន សុភី អភិបាលរងស្រុកកោះកុង តំណាងឲ្យសមាគមនារីខេត្តកោះកុង បានអញ្ជើញចុះជួបសំណេះសំណាលគ្រួសារសម្រាលកូន ០១គ្រួសារ នៅឃុំត្រពាំងរូង ស្រុកកោះកុង ខេត្តកោះកុង
ស្រុកកោះកុង ៖ នៅរសៀលថ្ងៃអង្គារ ១ រោច ខែពិសាខ ឆ្នាំឆ្លូវ ត្រីស័ក ពុទ្ធសករាជ ២៥៦៥ ត្រូវនឹងថ្ងៃទី២៧ ខែមេសា ឆ្នាំ២០២១ លោកស្រី អ៊ិន សុភី អភិបាលរងនៃគណៈអភិបាលស្រុកកោះកុង តំណាងឲ្យសមាគមនារី ដើម្បីសន្តិភាព និងអភិវឌ្ឍន៍ខេត្ត ដែលមានលោកជំទាវ មិថុនា ភូថង ជាប្រធានសមាគមនារី បានដឹកនាំក្រុមការងារសមាគមនារី ចុះជួបសំណេះសំណាល សួរសុខទុក្ខ និងនាំយកអំណោយមួយឈុតសម្រាប់កូនង៉ែត (Baby kits) រួមជាមួយថវិកាឧបត្ថម្ភជូនស្រ្តីសម្រាលកូនចំនួន ០១គ្រួសារ ដែលមានឈ្មោះ ស៊ន សិត ជាប្តីដែលបានទទួលមរណភាពកាលពីថ្ងៃទី២៥ ខែមេសា ដោយសារគ្រោះថ្នាក់ចរាចរណ៍ នៅស្រុកមណ្ឌលសីមា ដោយបន្សល់ទុកនូវប្រពន្ធឈ្មោះ ដួង ចំប៉ា និងកូន ដែលរស់នៅជាមួយឪពុកម្ដាយនៅភូមិត្រពាំងរូង ឃុំត្រពាំងរូង ស្រុកកោះកុង ខេត្តកោះកុង។
