លោក សុខ សុទ្ធី អភិបាលរងខេត្តកោះកុង ដឹកនាំកិច្ចប្រជុំសម្របសម្រួលដោះស្រាយបញ្ហាទំនាស់ដីធ្លី ស្ថិតនៅភូមិព្រែកស្វាយ សង្កាត់ស្ទឹងវែង ក្រុងខេមរភូមិន្ទ
លោក សុខ សុទ្ធី អភិបាលរង នៃគណៈអភិបាលខេត្តកោះកុង ដោយមានការអនុញ្ញាត និងណែនាំពីលោកជំទាវ មិថុនា ភូថង អភិបាលខេត្តកោះកុង បានដឹកនាំកិច្ចប្រជុំសម្របសម្រួលដោះស្រាយបញ្ហាដីធ្លី របស់ប្រជាពលរដ្ឋដែលមានទីតាំងស្ថិតនៅភូមិព្រែកស្វាយ សង្កាត់ស្ទឹងវែង ក្រុងខេមរភូមិន្ទ ខេត្តកោះកុង។ បញ្ហាទំនាស់ដីធ្លីនេះ កើតមានឡើងដោយសារតែ ប្រជាពលរដ្ឋចំនួន ៧គ្រួសារ កើតទុក្ខមិនសុខចិត្តអំពីទំហំដីរបស់ខ្លួន ព្រោះម្នាក់ៗអះអាងថា កាលពីដើមឡើយ ដីរបស់ខ្លួនមានទំហំ ទទឹង ២០ម៉ែត្រ និងបណ្តោយ ៥០ម៉ែត្រ ប៉ុន្តែដល់ពេលមន្ត្រីជំនាញចុះវាស់វែងដើម្បីចុះបញ្ជីដីធ្លីមានលក្ខណៈជាប្រព័ន្ធ ប្រវែងបណ្តោយដីរបស់ពួកគាត់គឺមិនបាន ៥០ម៉ែត្រទេ ហើយប្រវែងបណ្តោយដីរបស់គ្រួសារនីមួយៗក៏មិនស្មើគ្នាដែរ ព្រោះទីតាំងដីនេះមានប្រឡាយទឹកនៅពីខាងក្រោយដីរបស់ពួកគាត់។
ក្នុងកិច្ចប្រជុំនេះ លោក សុខ សុទ្ធី អភិបាលរងខេត្ត និងមន្ត្រីជំនាញ បានបញ្ជាក់ប្រាប់ប្រជាពលរដ្ឋថា កាលពីមុនការវាស់វែងដីគឺមិនបានធ្វើឡើងសុក្រឹត្យដូចបច្ចុប្បន្ននេះទេ ព្រោះកាលពីមុនការវាស់វែងពេលខ្លះ ដើរវាស់ជំហានក៏មាន។ ការបញ្ជាក់ជូនបែបនេះ ប្រជាពលរដ្ឋទាំង៧គ្រួសារ ក៏ឯកភាពផងដែរ។
ជាលទ្ធផល លោក សុខ សុទ្ធី អភិបាលរងខេត្ត បានធ្វើការសម្របសម្រួលដោះស្រាយដោយ កែសម្រួលស្ថានភាពប្រឡាយទឹកនៅផ្នែកខាងក្រោយទីតាំងដីប្រជាពលរដ្ឋនោះឱ្យត្រង់ដោយរក្សាទំហំប្រឡាយនៅដដែល ព្រោះប្រឡាយទឹកដែលមានស្រាប់នោះមិនត្រង់ទេ មានលក្ខណៈក្ងិចក្ងក់។ ការសម្រួលស្ថានភាពប្រឡាយទឹកនេះ ភាគីម្ចាស់ដីឈ្មោះ ង៉ែត ទុំ ដែលមានទីតាំងដីនៅជាប់នឹងប្រឡាយម្ខាងទៀតនោះ បានយល់ព្រមទទួលយក និងចូលរួមសហការជាមួយអាជ្ញាធរដើម្បីបញ្ចប់ករណីទំនាស់ខាងលើនេះ។ ការសម្របសម្រួលដោះស្រាយបញ្ហាទំនាស់ដីធ្លីស្ថិតនៅភូមិព្រែកស្ថាយ សង្កាត់ស្ទឹងវែង ក្រុងខេមរភូមិន្ទ ខេត្តកោះកុងនេះ ប្រជាពលរដ្ឋសប្បាយចិត្តទទួលយក និងចូលរួមសហការជាមួយអាជ្ញាធរទាំងអស់គ្នា។
នៅចុងបញ្ចប់នៃកិច្ចប្រជុំ បន្ទាប់ពីប្រជាពលរដ្ឋឯកភាព ព្រមព្រៀងទទួលយកការសម្របសម្រួលដោះស្រាយនេះហើយ លោក សុខ សុទ្ធី បានណែនាំដល់មន្ត្រីជំនាញចុះអនុវត្តការងារ និងរៀបចំចុះបញ្ជីក្បាលដីជូនប្រជាពលរដ្ឋទៅតាមនីតិវិធីច្បាប់៕