លោក អ៊ុក ភ័ក្រ្តា អភិបាលរង នៃគណៈអភិបាលខេត្តកោះកុង និងជាប្រធានលេខាធិការដ្ឋានគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាខេត្តកោះកុង (គ.អ.ឆ.ក) បានដឹកនាំក្រុមការងារ គ.អ.ឆ.ក ខេត្ត ចុះត្រួតពិនិត្យធុងសំរាមដែលរដ្ឋបាលខេត្ត បានផ្តល់ជូនឃុំពាមក្រសោប តាមរយៈគម្រោងអង្គការ PEMSEA និងបានចុះមើលទីតាំងសាងសង់ឡដុតសំរាម ដែលជាគម្រោងក្រសួងទេសចរណ៍ជូនឃុំ និងថ្នាលបណ្តុះកូនកោងកាងរបស់សហគមន៍ ដែលក្រុមការងារខេត្តគ្រោងនឹងចុះដាំនៅចុងខែកុម្ភៈ ខាងមុខនេះ។ ការចុះទៅឃុំនាពេលនេះគឺជាយន្តការតាមដាន និងគាំទ្រដល់ការគ្រប់គ្រងសំរាម និងសំណល់រឹងសហគមន៍ពាមក្រសោប និងមានគោលបំណងជួយធុងសំរាម និងគោយន្ត១គ្រឿងទៀតដល់សហគមន៍ ដើម្បីជំរុញអោយសហគមន៍នេះក្លាយជាសហគមន៍អេកូទេសចរណ៍គំរូមួយក្នុងការគ្រប់គ្រងសំរាម សំណល់រឹង និងមានបរិស្ថានល្អ សម្រាប់ខេត្តកោះកុង។ ក្នុងនោះផងដែរលោកអភិបាលរងខេត្តក៏បានផ្តល់ថវិកាផ្ទាល់ខ្លួនដល់ក្រុមជាង សាងសង់ឡដុតសំរាម ដើម្បីជាការលើកទឹកចិត្តផងដែរ៕