រដ្ឋបាលខេត្តកោះកុង

ដើម្បីសុខភាពសហគមន៍ សុខភាពសិក្សា ភូមិ ឃុំសុខចម្រើន ការគង់ស្នាក់អាស្រ័យរបស់ព្រះសង្ឃ សមណសិស្ស សិស្ស នារដូវវស្សានេះ​ ចៀសផុតពីជំងឺគ្រុនឈាម​ គ្រុនឈិ​ ក្នុងខេត្តកោះកុង​

លោកវេជ្ជបណ្ឌិត ទៅ ម៉ឹង ប្រធានមន្ទីរសុខាភិបាលនៃរដ្ឋបាលខេត្តកោះកុង លោក ង៉ែត ឡឹង ប្រធានមន្ទីរអប់រំ យុវជន និងកីឡា លោក គង់ ចន្ទថុល្ល ប្រធានមន្ទីរធម្មការ និងសាសនាស្ដីទី បានរួមគ្នាផ្សព្វផ្សាយអប់រំពីជំងឺគ្រុនឈាម គ្រុនឈិ​ និងគ្រោះថ្នាក់ដោយសារជក់បារីអេឡិចត្រូនិច នៅក្នុងវត្តទេពនិមិត្ត វត្តជោតញាណ វត្តអម្ពទិយារាម និងវត្តព្រះធម្មសាគររាម ស្ថិតនៅសង្កាត់ស្មាច់មានជ័យ ក្រុងខេមរភូមិន្ទ និងឃុំពាមក្រសោប ស្រុកមណ្ឌសីមា ខេត្តកោះកុង ។

លោកវេជ្ជបណ្ឌិត ទៅ ម៉ឹង និយាយថា យុទ្ធនាការអប់រំផ្សព្វផ្សាយបាញ់ថ្នាំសម្លាប់មូសខ្លា និងដាក់ថ្នាំអាបែត ដើម្បីបង្ការ និងទប់ស្កាត់ជំងឺគ្រុនឈាម ខណ:អត្រាជំងឺនេះកំពុងបង្កក្តីព្រួយបារម្ភអំឡុងរដូវវស្សា។

លោកប្រធានមន្ទីរសុខាភិបាលនៃរដ្ឋបាលខេត្តកោះកុង ក៏ស្នើឱ្យព្រះករុណាព្រះសង្ឃជាសមណសិស្ស សិស្ស ឧបាសកឧបាសិការ សីលវន្ត សីលវតី លោកអាចារ្យ គណៈកម្មវត្ត និងប្រជាពលរដ្ឋ អនុវត្តវិធានការ «៣កុំ៣បំបាត់» ឱ្យបានខ្ជាប់ខ្ជួន ដោយ «៣កុំ» រួមមាន កុំឱ្យមូសខាំ កុំឱ្យមូសបង្កាត់ពូជ និងកុំធ្វេសប្រហែសពេលមានអាការៈគ្រុនក្តៅ។ ចំណែក «៣បំបាត់» គឺបំបាត់ទឹកដក់ បំបាត់ដង្កូវទឹក និងបំបាត់ជម្រកមូស តាមរយៈការសម្អាតបរិស្ថានជុំវិញផ្ទះឱ្យបានស្អាត។

គួរជម្រាបថា ការចូលរួមរបស់ប្រជាពលរដ្ឋក្នុងការអនុវត្តវិធានការបង្ការជាប្រចាំ គឺជាកត្តាសំខាន់ក្នុងការកាត់បន្ថយការរីករាលដាលនៃជំងឺគ្រុនឈាម និងការពារសុខភាពសហគមន៍ឱ្យមានប្រសិទ្ធភាព ដើម្បីរួមចំណែកក្នុងកិច្ចកាកសាងជាតិ ឱ្យរុងរឿងថ្កុំថ្កើងជានិច្ច ៕

ថ្ងៃពុធ៨កើត ខែទុតិយសាឍ ឆ្នាំមមី អដ្ឋស័កព.ស.២៥៧០ ត្រូវនឹងថ្ងៃទី២៣ ខែកក្កដា ឆ្នាំ២០២៦