រដ្ឋបាលខេត្តកោះកុង

📣📣រដ្ឋបាលស្រុកបូទុមសាគរ សូមជម្រាបជូនដំណឹងដល់ លោក-លោកស្រី និងបងប្អូនប្រជាពលរដ្ឋ ដែលជាម្ចាស់សត្វពាហនៈ “គោ-ក្របី” នៅក្នុងមូលដ្ឋានស្រុក មេត្តាជ្រាបថា៖ រដ្ឋបាលស្រុកធ្លាប់បានធ្វើការផ្សព្វផ្សាយ ជូនដំណឹងការហាមឃាត់ការព្រលែងសត្វពាហនៈ“គោ-ក្របី” ដើរពាសវាលពាសកាល តាមដងផ្លូវសាធារណៈ និងទីប្រជុំជន ជាច្រើនដងរួចមកហើយ។

    ដោយសង្កេតឃើញថាជារៀងរាល់ថ្ងៃ នៅតែមានការព្រលែងសត្វ “គោ-ក្របី” ដើរពាសវាលតាមដងផ្លូវសាធារណៈ និងទីប្រជុំជន ដែលបានបង្ករឲ្យកើតមានគ្រោះថ្នាក់ចរាចរណ៍ ជាញឹកញាប់មួយរយៈពេលក្រោយមក ហើយម្យ៉ាងវិញទៀតសត្វ “គោ-ក្របី” ទាំងនោះបានដើរស៊ីដំណាំ របស់ប្រជាពលរដ្ឋ នឹងជុះអាចម៍ដាក់លើផ្លូវសាធារណៈ និងបានធ្វើឲ្យខូចសណ្តាប់ធ្នាប់របៀបរៀបរយ ខូចអនាម័យបរិស្ថាន និងគ្មានសោភណភាពនៅក្នុងស្រុក។

    ដើម្បីចៀសវាងគ្រោះថ្នាក់ចរាចរណ៍ ជាយថាហេតុ លើដងផ្លូវសាធារណៈ ដូចនេះ លោក-លោកស្រី ដែលជាម្ចាស់សត្វពាហនៈ“គោ-ក្របី” ត្រូវតែដាក់សត្វ “គោ-ក្របី” ក្នុងទ្រុង ឬក្រោលឲ្យបានត្រឹមត្រូវ និងហាមព្រលែងដើរពាសវាល ពាសកាល តាមដងផ្លូវសាធារណៈ និងទីប្រជុំជន ដោយកំណត់រយៈពេល ១សប្តាណ៍ ចាប់គិតចាប់ពីថ្ងៃ៣១ ខែកក្កដា ដល់ថ្ងៃទី០៧ ខែសីហា ឆ្នាំ២០២៥ ។ ប្រសិនករណី លោក-លោកស្រី ដែលជាម្ចាស់សត្វគោក្របី នៅតែបន្តព្រលែងសត្វពាហនៈ “គោ-ក្របី”  ដើរពាសវាល ពាសកាលតទៅទៀត  មិនអនុវត្តតាមសេចក្តីជូនដំណឹងនេះ។     រដ្ឋបាលស្រុក នឹងចាត់វិធានការចុះចាប់ និងប្រមូលសត្វពាហនៈ “គោ-ក្របី” របស់លោក-លោកស្រី ដែលព្រលែងដើរពាលវាល ពាសកាល ថែមទាំងអញ្ជើញ លោក-លោកស្រី ម្ចាស់សត្វ“គោ-ក្របី” មកធ្វើកិច្ចសន្យា និងផាកពិន័យតាមផ្លូវច្បាប់ ។ រដ្ឋបាលស្រុកបូទុមសាគរ សង្ឃឹមយ៉ាងមុតមាំថា លោក លោកស្រី ជាម្ចាស់ សត្វពាហនៈ“គោ-ក្របី”ពិតជាមានសុឆន្ទះក្នុងការចូលរួមសហការ និងអនុវត្តជាក់ស្តែងពុំខានឡើយ។សូមអរគុណ!🙏🏻🙏🏻🙏🏻