រដ្ឋបាលខេត្តកោះកុង

នៅសាលប្រជុំបញ្ជាការដ្ឋានកងរាជអាវុធហត្ថខេត្តកោះកុង បានរៀបចំពិធីប្រកាសមុខតំណែង ផ្ទេរភារកិច្ច និងបំពាក់ឋានន្តរសក្តិ ជូនយោធិន នៃកងរាជអាវុធហត្ថខេត្តកោះកុង ក្រោមអធិបតីភាព លោកឧត្តមសេនីយ៍ត្រី តាំង ឈុនស្រេង មេបញ្ជាការ ក្នុងនោះបំពាក់ឋានន្តរសក្តិចំនួន ២៩រូប (ថ្នាក់អនុសេនីយ៍ឯក ចំនួន២០រូប ថ្នាក់អនុសេនីយ៍ទោ ០៧រូប ថ្នាក់អនុសេនីយ៍ត្រី ចំនួន០១រូប ថ្នាក់នាយឯកចំនួន០១រូប) ផ្ទេរភារកិច្ចចំនួន២២នាក់ និងតែងតាំងផ្លាស់ប្ដូរមុខតំណែង (កងអនុសេនាធំចល័ត)ចំនួន៣៨នាក់។
សមាសភាពចូលរួមមាន÷ មេបញ្ជាការរង នាយសេនាធិការរង ប្រធាន-អនុប្រធានមន្ទីរទាំង៧  នាយ-នាយរងការិយាល័យ មេបញ្ជាការមូលដ្ឋានក្រុង ស្រុក ប្រធានស្នាក់ការ និងនាយ-នាយរងអាវុធហត្ថដែលមានការពាក់ព័ន្ធ សរុបចំនួន ១១៥នាក់(នារី០៨នាក់)។
ក្នុងឱកាសនេះផងដែរ លោកឧត្តមសេនីយ៍ត្រី មេបញ្ជាការ បានមានមតិលើកសរសើរ និងវាយតម្លៃខ្ពស់ចំពោះការខិតខំយកចិត្តទុកដាក់បំពេញភារកិច្ចរបស់ មេបញ្ជាការគ្រប់លំដាប់ថ្នាក់ គ្រប់ជំនាញដែលបានលះបង់កម្លាំងកាយ កម្លាំងចិត្ត ស្មារតី ចូលរួមសហការជាមួយអាជ្ញាធរមូលដ្ឋាន និងស្ថាប័នពាក់ព័ន្ធ បានយ៉ាងល្អក្នុងកិច្ចប្រតិបត្តិការប្រកបដោយប្រសិទ្ធភាពក្នុងការងារ ការពារសន្តិសុខ សុវត្ថិភាព រក្សាសណ្ដាប់ធ្នាប់របៀបរៀបរយសង្គម និងបង្ក្រាបបទល្មើសបានជាបន្តបន្ទាប់។
ក្នុងនោះលោកមេបញ្ជាការ ក៏បានណែនាំឲ្យនាយទាហាន នាយទាហានរង ដែលត្រូវបានប្រកាសតែងតាំងផ្លាស់ប្ដូរភារកិច្ច និងត្រូវបានបំពាក់ឋានន្តរសក្កិ នាឱកាសពេលនេះ ត្រូវខិតខំយកចិត្តទុកដាក់បំពេញភារកិច្ចឲ្យបានល្អជូនអង្គភាព និងចូលរួមអនុវត្តនូវទិសស្លោករបស់ លោកនាយឧត្តមសេនីយ៍ មេបញ្ជាការកងរាជអាវុធហត្ថលើផ្ទៃប្រទេស (ចំពោះប្រទេសត្រូវតែការពារ ចំពោះប្រជាត្រូវតែបម្រើ ច្បាប់ត្រូវតែគោរព បទល្មើសត្រូវតែបង្ក្រាប និងជួយគិត ជួយធ្វើ រួមគ្នាទទួលខុសត្រូវ) និងអនុសាសន៍ថ្មីចំនួន៣ចំណុចទៀតនោះគឺ(កសាង ហ្វឹកហ្វឺន ប្រតិបត្តិការ)។

ជាចុងបញ្ចប់លោកមេបញ្ជាការ សុំឲ្យនាយទាហាន នាយទាហានរង នៃកងរាជអាវុធហត្ថខេត្តកោះកុងយើងទាំងអស់គ្នាត្រូវមានសាមគ្គីភាពផ្ទៃក្នុង និងអនុវត្តតាមតួនាទី ភារកិច្ចរបស់ខ្លួនឲ្យមានប្រសិទ្ធភាពខ្ពស់ ឲ្យសមទៅនឹងការលើកទឹកចិត្ត ដែលថ្នាក់លើបានផ្ដល់ជូននាពេលនេះ៕
ថ្ងៃអង្គារ ៦ រោច ខែពិសាខ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៨ ខែឧសភា ឆ្នាំ២០២៤ May 28, 2024