លោក សុខ សុទ្ធី អភិបាលរងខេត្តកោះកុង បានអញ្ជើញដឹកនាំកិច្ចប្រជុំពិភាក្សាលើករណីសំណើសូមកាត់ដីចេញពីបញ្ជីទ្រព្យរដ្ឋ នៃដីស្ថិតនៅសង្កាត់ដងទង់ ក្រុងខេមរភូមិន្ទ ខេត្តកោះកុង
លោក សុខ សុទ្ធី អភិបាលរង នៃគណៈអភិបាលខេត្តកោះកុង ដោយមានការអនុញ្ញាតពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំពិភាក្សា លើសំណើរបស់ប្រជាពលរដ្ឋចំនួន ២ករណី ដូចខាងក្រោម៖
១. ករណីប្រជាពលរដ្ឋចំនួន ១៨គ្រួសារ ស្នើសូមចេញវិញ្ញាបនបត្រសម្គាល់ម្ចាស់អចលនវត្ថុ នៃដីស្ថិតនៅភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង៖ ទីតាំងដីនេះ កាលពីមុនគឺជាអតីតដីរដ្ឋគ្រប់គ្រងដោយមន្ទីរឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ខេត្តកោះកុង (អតីតដីរោងចក្រត្រីខកំប៉ុង) ប៉ុន្តែដោយសារទីតាំងដីនេះ អតីតមន្ត្រីរាជការ កម្មករ បានកាន់កាប់ រស់នៅ អាស្រ័យផលយូរមកហើយ ទើបរាជរដ្ឋាភិបាលសម្រេច ជម្រះទីតាំងដីនេះចេញពីបញ្ជីសារពើភណ្ឌទ្រព្យរដ្ឋ ដោយផ្តល់ជូនប្រជាពលរដ្ឋចំនួន ១៨គ្រួសារ។ តាមរយៈកិច្ចប្រជុំនេះ និងការពិនិត្យលើឯកសារគតិយុត្តផ្សេងៗ លោក សុខ សុទ្ធី អភិបាលរងខេត្តកោះកុង តំណាងរដ្ឋបាលខេត្ត បានណែនាំឱ្យមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកោះកុង ចេញវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋទាំង ១៨គ្រួសារ។
២. ករណីប្រជាពលរដ្ឋឈ្មោះ ឡន សង្ហី ស្នើសូមកាត់ឆ្វៀលដីចេញពីទ្រព្យរដ្ឋរបស់រដ្ឋបាលខេត្តកោះកុង៖ ទីតាំងដីនេះមានទំហំ ៤៦ម៉ែត្រការ៉េ ស្ថិតនៅភូមិ៤ សង្កាត់ដងទង់ ក្រុងខេមរភូមិន្ទ ខេត្តកោះកុង។ តាមរយៈកិច្ចប្រជុំនេះ លោក សុខ សុទ្ធី អភិបាលរងខេត្ត តំណាងរដ្ឋបាលខេត្តកោះកុង ណែនាំឱ្យអ្នកពាក់ព័ន្ធអនុវត្តនីតិវីធី ដើម្បីកាត់ផ្ទៃដីនេះចេញពីបញ្ជីទ្រព្យរដ្ឋរបស់រដ្ឋបាលខេត្តកោះកុង ព្រោះដីនេះ ឈ្មោះ ឡន សង្ហី បានកាន់កាប់អាស្រ័យផលយូរហើយ។
ថ្ងៃព្រហស្បតិ៍ ៩ កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី១៦ ខែឧសភា ឆ្នាំ២០២៤ May 16, 2024