គ្រួសាររងគ្រោះដោយសារខ្យល់កន្ទ្រាក់ ទទួលបានអំណោយ ពីសាខាកាកបាទក្រហម
សាខាកក្រក ខេត្តកោះកុង ៖ រសៀលថ្ងៃពុធ ៧កើត ខែស្រាពណ៍ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី ៧ ខែសីហា ឆ្នាំ២០១៩ នៅសាលាឆាន់វត្តមន្នីជីខលើ សាខាកាកបាទក្រហមកម្ពុជា ខេត្តកោះកុង ដឹកនាំដោយ ឯកឧត្តម លី សារ៉េត អនុ ប្រធានគណៈកម្មាធិការសាខា សហការជាមួយអនុសាខាកក្រក ស្រុកស្រែអំបិល រួមដំណើរជាមួយអជ្ញាធរមូលដ្ឋាន បានអញ្ជើញចុះសួរសុខទុក្ខ និង នាំយកអំណោយមនុស្សធម៌ទៅចែកជូនគ្រួសាររងគ្រោះដោយសារខ្យល់កន្ទ្រាក់កាលពី ថ្ងៃទី៤ និងទី៥ ខែសីហា ឆ្នាំ២០១៩ ចំនួន ៣០គ្រួសារ ស្មើនឹង៣០ខ្នងផ្ទះ រស់នៅឃុំជ្រោយស្វាយ០៧គ្រួសារ ឃុំដងពែង១៣គ្រួសារ ឃុំជីខលើ០៧គ្រួសារ និងឃុំជីខក្រោម០៣គ្រួសារ ក្នុង ស្រុកស្រែអំបិល ខេត្តកោះកុង ដែលបណ្តាលអោយខូចខាតក្បឿងស៊ីម៉ង់ចំនួន ៣៦សន្លឹក ស័ង្កសីចំនួន១៣១សន្លឹក និងសម្ភារមួយចំនួនទៀត។
ក្នុងឱកាសនោះដែរ ឯកឧត្តម លី សារ៉េត អនុប្រធានគណៈកម្មាធិការសាខា បានពាំនាំនូវប្រសាសន៍ផ្តាំផ្ញើសួរសុខទុក្ខ និងសោកស្តាយពីសំណាក់ លោកជំទាវ មិថុនា ភូថង ប្រធានគណៈកម្មាធិការសាខា ពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចជាកាលសម្តេច តែងតែគិតគូរអំពីសុខទុក្ខរបស់បងប្អូនប្រជាពលរដ្ឋនៅគ្រប់ទីកន្លែង ដោយមិនមានការប្រកាន់ ពូជសាសន៍ ពណ៌សម្បុរ និន្នាការនយោបាយអ្វីឡើយ។ ជាមួយគ្នានេះ ឯកឧត្តម បានអំពាវនាវដល់បងប្អូនប្រជាពលរដ្ឋទាំងអស់ ពិសេសបងប្អូនប្រជានេសាទ ត្រូវមានការប្រុងប្រយ័ត្នខ្ពស់ពីបាតុភូតខ្យល់កន្ត្រាក់ ផ្គរ រន្ទះ រលក សមុទ្រធំៗខ្ពស់ៗ។ ទន្ទឹមនឹងនេះ បងប្អូនប្រជាពលរដ្ឋថែទាំសុខភាពឱ្យបានល្អ ជាពិសេសទៅលើកុមារតូចៗ ត្រូវស្លៀកខោអាវវែង និងគេងនៅក្នុងមុងជ្រលក់ថ្នាំដើម្បីការពារជំងឺគ្រុនឈាមដែលកំពុងរីករាលដាល ព្រមទាំងចេះសម្អាតអនាម័យជុំវិញខ្លួន និងចូលរួមគោរពច្បាប់ចរាចរណ៍ទាំងអស់គ្នា។
គ្រួសារនីមួយៗទទួលបាន ៖ អង្ករចំនួន ២៥គីឡូក្រាម មី១កេស ត្រីខ១០កំប៉ុង តង់១ និងអាវយឺត២ ។ ដោយឡែក ថវិកាបានប្រគល់អោយលោកស្រីអនុប្រធានគណៈកម្មាធិការអនុសាខាស្រុកស្រែអំបិល តំណាងប្រជាពលរដ្ឋ ដើម្បីទិញជា ក្បឿងស៊ីម៉ង់ និងស័ង្កសី ឆ្លើយតប ទៅតាមទំហំនៃការខូចខាតរបស់គ្រួសាររងគ្រោះនីមួយៗ៕
