សារលិខិតចូលរួមរំលែកទុក្ខ របស់សាខា កាកបាទក្រហមកម្ពុជា ខេត្តកោះកុង ជូនចំពោះក្រុមគ្រួសារសព លោក មេង យុយ ប្រធានក្រុមការងារកាកបាទក្រហមឃុំដងពែង ស្រុកស្រែអំបិល ខេត្តកោះកុង ។
គណៈកិត្តិយស គណៈកម្មាធិការសាខា/អនុសាខា ក្រុមប្រតិបត្តិសាខា ក្រុមការងារកាកបាទក្រហមកម្ពុជា ឃុំ/សង្កាត់ អ្នកស្ម័គ្រចិត្ត ទីប្រឹក្សាយុវជន និងយុវជនទាំងអស់ នៃសាខាកាកបាទក្រហមកម្ពុជា ខេត្តកោះកុង សូមចូលរួមរំលែកទុក្ខ និងសោកសង្រេងយ៉ាងក្រៀមក្រំពោរពេញទៅដោយសេចក្តីសោកស្តាយស្រណោះអាឡោះអាល័យជាទីបំផុតចំពោះមរណភាពរបស់លោក មេង យុយ ប្រធានក្រុមការងារកាកបាទក្រហមឃុំដងពែង កាលពីថ្ងៃព្រហស្បតិ៍ ៤កើត ខែពិសាខ ឆ្នាំឆ្លូវ ទោស័ក ព.ស ២៥៦៤ ត្រូវនឹងថ្ងៃទី១៥ ខែមេសា ឆ្នាំ ២០២១ ដោយសារគ្រោះថ្នាក់ចរាចរណ៍ ក្នុងជុន្មាយុ ៦១ឆ្នាំ។មរណភាពរបស់លោក មេង យុយ ជាការបាត់បង់នូវជីតា ស្វាមី ឳពុក ជាទីគោរពស្រលាញ់ របស់ក្រុមគ្រួសារ ក៏ដូចជាបងប្អូនប្រជាពលរដ្ឋនៅក្នុងឃុំដងពែង ដែលលោកប្រកបដោយព្រហ្មវិហារធម៌ ហើយក៏ជាការបាត់បងនូវឥស្សរជនដ៏ឆ្នើមមួយរូប ដែលកន្លងមកមួយជីវិតរបស់លោក បានយកអស់នូវកម្លាំងកាយចិត្ត និងស្មារតីចូលរួមយ៉ាងសកម្មក្នុង ការរួមចំណែកជាមួយជាតិមាតុភូមិ និងដឹកនាំ គ្រប់គ្រង ការងារមនុស្សធម៌កន្លងមក ព្រមទាំង ចូលរួមអភិវឌ្ឍន៍ខេត្តកោះកុង ជាពិសេសនៅមូលដ្ឋាន ឃុំដងពែង ស្រុកស្រែអំបិល ឱ្យរីកចម្រើនលើគ្រប់វិស័យគួរជាទីមោទនៈ។
យើងខ្ញុំទាំងអស់គ្នានឹងចងចាំជានិច្ចនូវគុណូបការៈដ៏ប្រពៃថ្លៃថ្លា ពលីខ្ពស់ និងទឹកចិត្តស្នេហាជាតិដ៏ស្មោះស្ម័គ្ររបស់លោក មេង យុយ ចំពោះជាតិមាតុភូមិ។
យើងខ្ញុំទាំងអស់គ្នា ក៏សូមបួងសួងគុណបុណ្យព្រះរតនត្រ័យ និងវត្ថុស័ក្តសិទ្ធទាំងអស់ក្នុងលោក សូមប្រោសព្រំដួងវិញ្ញាណក្ខន្ធរបស់លោក មេង យុយ បានទៅកាន់សុគតិភពនៃឋានបរិនិព្វាន ជានិច្ចនិរន្តរ៍ កុំបីឃ្លៀងឃ្លៀតឡើយ។
