លោកជំទាវ ឈី វ៉ា អភិបាល នៃគណៈអភិបាលខេត្តកោះកុង បានអញ្ជើញប្រគេនទេយ្យទានដល់ព្រះសង្ឃ ដែលគង់ចាំព្រះវស្សានៅវត្តសិលាមុន្នីគិរីរង្សី (វត្តថ្មបាំងលើ) ស្ថិតក្នុងភូមិត្រពាំងឈើត្រាវ ឃុំឫស្សីជ្រុំ ស្រុកថ្មបាំង ខេត្តកោះកុង
លោកជំទាវ ឈី វ៉ា អភិបាល នៃគណៈអភិបាលខេត្តកោះកុង បានអញ្ជើញប្រគេនទេយ្យទានដល់ព្រះសង្ឃ ដែលគង់ចាំព្រះវស្សានៅវត្តសិលាមុន្នីគិរីរង្សី (វត្តថ្មបាំងលើ) ស្ថិតក្នុងភូមិត្រពាំងឈើត្រាវ ឃុំឫស្សីជ្រុំ ស្រុកថ្មបាំង ខេត្តកោះកុង។ ពិធីនេះបានប្រព្រឹត្តទៅក្នុងបរិយាកាសដ៏សោមនស្សរីករាយ ប្រកបដោយសទ្ធាជ្រះថ្លារបស់ពុទ្ធបរិស័ទ និងអ្នកចូលរួមយ៉ាងច្រើនកុះករ ស្របពេលដែលស្រុកថ្មបាំងក៏បានរៀបចំពិធីបុណ្យពូនភ្នំទុរេនសាមគ្គី ដើម្បីលើកកម្ពស់វិស័យកសិកម្ម និងទេសចរណ៍របស់មូលដ្ឋាន។
ក្នុងឱកាសនោះ លោកជំទាវអភិបាលខេត្តបានគោរពថ្វាយបង្គំព្រះរតនត្រ័យ និងប្រគេនទេយ្យទាន រួមមានទេយ្យវត្ថុ គ្រឿងឧបភោគ បរិភោគ និងបច្ច័យ ដើម្បីឧបត្ថម្ភដល់ព្រះសង្ឃដែលកំពុងគង់ចាំព្រះវស្សា។ ការប្រគេនទេយ្យទាននេះ បានបង្ហាញពីការយកចិត្តទុកដាក់របស់ថ្នាក់ដឹកនាំខេត្តចំពោះការលើកតម្កើងព្រះពុទ្ធសាសនា ដែលជាសាសនារបស់រដ្ឋ និងជាមូលដ្ឋាននៃការអប់រំសីលធម៌ គុណធម៌ និងការរស់នៅប្រកបដោយសុខដុមរមនាក្នុងសង្គម។
លោកជំទាវបានមានប្រសាសន៍ថា ព្រះពុទ្ធសាសនាបានរួមចំណែកយ៉ាងសំខាន់ក្នុងការអប់រំផ្លូវចិត្ត បណ្តុះស្មារតីមនុស្សឱ្យប្រកាន់ខ្ជាប់នូវគុណធម៌ សីលធម៌ និងការធ្វើអំពើល្អ។ ដូច្នេះ ការគាំទ្រដល់វិស័យព្រះពុទ្ធសាសនា គឺជាកាតព្វកិច្ចរួមរបស់អាជ្ញាធរ ព្រះសង្ឃ និងប្រជាពលរដ្ឋ ដើម្បីរួមគ្នាថែរក្សា និងអភិរក្សអត្តសញ្ញាណ វប្បធម៌ ប្រពៃណី និងជំនឿដ៏ល្អផូរផង់របស់ជាតិខ្មែរ។
លោកជំទាវបានកោតសរសើរចំពោះព្រះចៅអធិការ ព្រះសង្ឃ គណៈកម្មការអាចារ្យវត្ត ពុទ្ធបរិស័ទ និងសប្បុរសជនទាំងអស់ ដែលបានរួមចំណែកកសាង និងអភិវឌ្ឍវត្តសិលាមុន្នីគិរីរង្សីឱ្យមានការរីកចម្រើនជាបន្តបន្ទាប់។ វត្តមិនត្រឹមតែជាទីកន្លែងប្រតិបត្តិព្រះធម៌ និងប្រារព្ធពិធីបុណ្យសាសនាប៉ុណ្ណោះទេ ប៉ុន្តែថែមទាំងជាមជ្ឈមណ្ឌលអប់រំសីលធម៌ និងជាទីប្រជុំសាមគ្គីរបស់ប្រជាពលរដ្ឋនៅក្នុងសហគមន៍ផងដែរ។
ជាមួយគ្នានេះ លោកជំទាវបានអំពាវនាវឱ្យប្រជាពលរដ្ឋបន្តគោរពប្រតិបត្តិតាមគន្លងព្រះពុទ្ធសាសនា ថែរក្សាប្រពៃណីទំនៀមទម្លាប់ដ៏ល្អរបស់ជាតិ រួមគ្នាកសាងសាមគ្គីភាព សន្តិភាព និងការអភិវឌ្ឍនៅមូលដ្ឋានឱ្យកាន់តែរីកចម្រើន។ ទន្ទឹមនឹងនោះ ក៏សូមបន្តចូលរួមថែរក្សាបរិស្ថាន អនាម័យ និងសោភ័ណភាពវត្តអារាមឱ្យបានស្អាត ស័ក្តិសមជាទីសក្ការបូជា និងជាគោលដៅទេសចរណ៍វប្បធម៌ និងសាសនា។
លោកជំទាវក៏បានជូនពរដល់ព្រះសង្ឃគ្រប់ព្រះអង្គ សូមមានព្រះសុខភាពល្អ ព្រះកាយមាំមួន ព្រះបញ្ញាញាណភ្លឺថ្លា គង់ជាម្លប់ដ៏ត្រជាក់ដល់ពុទ្ធបរិស័ទ និងបន្តផ្សព្វផ្សាយព្រះធម៌អប់រំប្រជាពលរដ្ឋឱ្យប្រព្រឹត្តអំពើល្អ ជៀសវាងអំពើអបាយមុខ និងរួមចំណែករក្សាសុខសន្តិភាព និងស្ថិរភាពសង្គម។
ក្នុងឱកាសនោះដែរ លោកជំទាវបានប្រសិទ្ធពរជ័យជូនប្រជាពលរដ្ឋទាំងអស់ សូមប្រកបដោយសុខភាពល្អ សុភមង្គល សេចក្តីចម្រើនក្នុងក្រុមគ្រួសារ ទទួលបានជោគជ័យក្នុងការប្រកបមុខរបរ និងរួមគ្នាបន្តអភិវឌ្ឍខេត្តកោះកុងឱ្យកាន់តែមានភាពរីកចម្រើនលើគ្រប់វិស័យ ស្របតាមគោលនយោបាយរបស់រាជរដ្ឋាភិបាល និងឆ្ពោះទៅរកការអភិវឌ្ឍប្រកបដោយចីរភាព។
ថ្ងៃសៅរ៍ ១២រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១១ ខែកក្កដា ឆ្នាំ២០២៦
