រដ្ឋបាលខេត្តកោះកុង

លោកជំទាវ ឈី វ៉ា អភិបាល នៃគណៈអភិបាលខេត្តកោះកុង បានអញ្ជើញស្វាគមន៍ អ្នកឧកញ៉ា តែ តាំងប៉ ប្រធានក្រុមប្រឹក្សាភិបាល សមាគមមូលនិធិ សម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា ដើម្បីពិភាក្សាការងារមួយចំនួន ជាមួយរដ្ឋបាលខេត្តកោះកុង។

លោកជំទាវអភិបាលខេត្ត បានលើកឡើងថា ខ្ញុំសូមឆ្លៀតឱកាសនេះ ជម្រាបជូនថា ៖ ខេត្តកោះកុង ជាខេត្តដែលមានសក្តានុពល ខ្ពស់លើវិស័យកសិកម្ម ទេសចរណ៍ ឧស្សាហកម្មកែច្នៃ ភស្តុភារកម្ម ពាណិជ្ជកម្ម និងសេដ្ឋកិច្ច។ ការអភិវឌ្ឍសហគ្រាសធុនតូច និងមធ្យម នឹងក្លាយជាកម្លាំងចលករដ៏សំខាន់ ក្នុងការបង្កើតការងារ បង្កើនប្រាក់ចំណូល និងលើកកម្ពស់ជីវភាពប្រជាពលរដ្ឋ។ រដ្ឋបាលខេត្ត តែងតែយកចិត្តទុកដាក់សម្របសម្រួល និងគាំទ្រដល់អ្នក វិនិយោគ សហគ្រិន និងវិស័យឯកជន តាមរយៈការបង្កើតបរិយាកាសអំណោយផល ការកែលម្អសេវាសាធារណៈ និងការលើកកម្ពស់ភាពជាដៃគូ រវាងរដ្ឋ និងឯកជន។ យើងខ្ញុំជឿជាក់ថា កិច្ចសហការ ជាមួយសមាគមមូលនិធិសម្តេចតេជោ នឹងជួយពង្រឹងសមត្ថភាពសហគ្រាស ក្នុងខេត្ត ឱ្យកាន់តែមានភាពប្រកួតប្រជែង អាចចូលរួមក្នុងខ្សែច្រវាក់តម្លៃ និងពង្រីកទីផ្សារទាំងក្នុង និងក្រៅប្រទេស។ ក្នុងឱកាសនេះ រដ្ឋបាលខេត្ត សូមសម្តែងនូវការគាំទ្រយ៉ាងពេញទំហឹង ចំពោះសកម្មភាព និងគម្រោងនានារបស់សមាគម ដែលមានគោលបំណងជួយ ដល់សហគ្រាសធុនតូច និងមធ្យម ជាពិសេសការបណ្តុះបណ្តាល ការពង្រឹងជំនាញ ការផ្តល់ប្រឹក្សា ការច្នៃប្រឌិត និងការស្វែងរកប្រភពហិរញ្ញប្បទាន។
យើងខ្ញុំសង្ឃឹមថា ដំណើរទស្សនកិច្ច និងកិច្ចពិភាក្សានាពេលនេះ នឹងក្លាយជា ចំណុចចាប់ផ្តើម នៃកិច្ចសហប្រតិបត្តិការកាន់តែជិតស្និទ្ធ រវាងរដ្ឋបាលខេត្ត និងសមាគម ដើម្បីរួមគ្នាជំរុញការអភិវឌ្ឍសហគ្រាសធុនតូច និងមធ្យម ឱ្យរីកចម្រើនប្រកបដោយចីរភាព។
ជាថ្មីម្តងទៀត ខ្ញុំសូមសម្តែងនូវការស្វាគមន៍យ៉ាងកក់ក្តៅបំផុត ចំពោះ ប្រធានក្រុមប្រឹក្សាភិបាល និងប្រតិភូទាំងអស់ និងសូមជូនពរ ឱ្យការបំពេញបេសកកម្ម នៅខេត្តកោះកុង ទទួលបានលទ្ធផលជោគជ័យតាមការគ្រោងទុក។
ថ្ងៃពុធ ៩រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី៨ ខែកក្កដា ឆ្នាំ២០២៦