រដ្ឋបាលខេត្តកោះកុង

លោកជំទាវ ឈី វ៉ា អភិបាល នៃគណៈអភិបាលខេត្តកោះកុង បានអញ្ជើញស្វាគមន៍លោកជំទាវ ហ៊ុន ដានី រដ្ឋលេខាធិការ ក្រសួងទេសចរណ៍ និងជាតំណាងដ៏ខ្ពង់ខ្ពស់ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ក្នុងវគ្គបណ្តុះបណ្តាលដល់ជនបង្គោលយេនឌ័រក្នុងវិស័យទេសចរណ៍ ស្តីពី“ភាពជាអ្នកដឹកនាំ និងការពង្រឹងភាពអង់អាច”។

លោកជំទាវអភិបាលខេត្ត បានលើកឡើងថា ការអភិវឌ្ឍវិស័យទេសចរណ៍ប្រកបដោយចីរភាព មិនអាចខ្វះបាននូវធនធានមនុស្ស ដែលមានសមត្ថភាព មានភាពជាអ្នកដឹកនាំ និងមានការចូលរួមប្រកបដោយសមធម៌ រវាង ស្ត្រី និងបុរស។ ដូច្នេះការលើកកម្ពស់ភាពជាអ្នកដឹកនាំ និងការពង្រឹងភាពអង់អាច ដល់ស្ត្រីក្នុងវិស័យទេសចរណ៍ គឺជាកត្តាសំខាន់ក្នុងការបង្កើនប្រសិទ្ធភាពការងារ ការផ្តល់សេវាកម្ម និងការអភិវឌ្ឍសេដ្ឋកិច្ចមូលដ្ឋាន។ រាជរដ្ឋាភិបាលកម្ពុជា តែងតែយកចិត្តទុកដាក់លើការលើកកម្ពស់សមភាពយេនឌ័រ និងការបង្កើនការចូលរួមរបស់ស្ត្រី ក្នុងការសម្រេចចិត្ត និងភាពជាអ្នកដឹកនាំ ស្របតាមយុទ្ធសាស្ត្របញ្ចកោណ ដំណាក់កាលទី១ និងគោលនយោបាយជាតិពាក់ព័ន្ធនានា។ វិស័យទេសចរណ៍ក៏ជាវិស័យមួយដែលស្ត្រីមានការចូលរួមយ៉ាងសកម្ម ហើយជាកម្លាំងដ៏សំខាន់ក្នុងការជំរុញកំណើនសេដ្ឋកិច្ច និងការអភិវឌ្ឍសហគមន៍។ វគ្គបណ្តុះបណ្តាលនាពេលនេះ នឹងផ្តល់ឱកាសដល់សិក្ខាកាម ក្នុងការពង្រឹងចំណេះដឹង និងជំនាញលើភាពជាអ្នកដឹកនាំ ការទំនាក់ទំនង ការសម្រេចចិត្ត ការដោះស្រាយបញ្ហា និងការបញ្ជាបទស្សនៈយេនឌ័រ ក្នុងការអនុវត្តការងារប្រចាំថ្ងៃ។ ខ្ញុំជឿជាក់ថា ចំណេះដឹង និងបទពិសោធន៍ដែលទទួលបានពីវគ្គនេះ នឹងអាចយកទៅអនុវត្តជាក់ស្តែង ដើម្បីលើកកម្ពស់គុណភាពការងារ និងសេវាកម្មទេសចរណ៍ឱ្យកាន់តែមានប្រសិទ្ធភាព។ នាងខ្ញុំសូមលើកទឹកចិត្ត ដល់សិក្ខាកាមទាំងអស់ ឱ្យចូលរួមយ៉ាងសកម្ម ផ្លាស់ប្តូរបទពិសោធន៍ លើកជាសំណួរ និងចែករំលែកគំនិតថ្មីៗ ដើម្បីឱ្យវគ្គបណ្តុះបណ្តាលនេះ ទទួលបានលទ្ធផលល្អ និងអាចយកទៅអនុវត្តបានពិតប្រាកដនៅតាមស្ថាប័ន និងអង្គភាពរៀងៗខ្លួន។
ថ្ងៃពុធ ២រោច ខែបឋមាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១ ខែកក្កដា ឆ្នាំ២០២៦