រដ្ឋបាលខេត្តកោះកុង

ថ្ងៃសៅរ៍ ទី២១ ខែមីនា ឆ្នាំ២០២៦ មន្ទីរពាណិជ្ជកម្មខេត្តកោះកុង បានចូលរួមគាំទ្រ និងអនុវត្ត “យុទ្ធនាការផលិតផលជាតិ #MadeInCambodia” ក្រោមគំនិតផ្តួចផ្តើមរៀបចំដោយក្រសួងពាណិជ្ជកម្ម និងមានការចូលរួមពីផ្សារទំនើប និងម៉ាត នៅក្រុងខេមរភូមិន្ទ ខេត្តកោះកុង រួមមាន៖ ផ្សារទំនើបឡាក់គី តេលាម៉ាត Bonjour និង សាយឈុន ម៉ាត។ ក្នុងគោលបំណងផ្សព្វផ្សាយ គាំទ្រ និងលើកកម្ពស់ផលិតផលក្នុងស្រុកឲ្យកាន់តែទូលំទូលាយជូនដល់ប្រជាពលរដ្ឋ ជំរុញការប្រើប្រាស់ផលិតផលជាតិ ព្រមទាំងបង្កើនឱកាសទីផ្សារសហគ្រាសក្នុងស្រុក និងរួមចំណែកអភិវឌ្ឍសេដ្ឋកិច្ចជាតិឲ្យមានភាពរឹងមាំ និងចីរភាព។
“យុទ្ធនាការផលិតផលជាតិ #MadeInCambodia” នឹងប្រព្រឹត្តិទៅក្នុងរយៈពេល ១ ឆ្នាំពេញ ក្នុងនោះ ផ្សារទំនើប ម៉ល ម៉ាត និងមីនីម៉ាត នៅទូទាំងរាជធានី ខេត្ត នឹងចូលរួមរៀបចំតុបតែងធ្នើរដាក់តាំងលក់ផលិតផលជាតិឲ្យកាន់តែមានភាពទាក់ទាញ និងលេចធ្លោផងដែរ។ មកដល់ពេលនេះមានផ្សារទំនើប ម៉ល ម៉ាត និងមីនីម៉ាតចំនួនប្រមាណ ជាង៤០០ទីតាំង ក្នុងរាជធានី ខេត្ត ចូលរួមក្នុងយុទ្ធនាការនេះ។