គណៈកម្មាធិការអនុសាខាកាកបាទក្រហមកម្ពុជា ស្រុកមណ្ឌលសីមា ទទួលទេយ្យទាន ជាគ្រឿងឧបភោគបរិភោគ មួយចំនួន ពីព្រះតេជគុណ វង្ស វុទ្ធី ចៅអធិការវត្ត សមុទ្ធារាម ហៅវត្តប៉ាក់ខ្លង
សាខា កក្រក ខេត្តកោះកុង ៖ ថ្ងៃសៅរ៍ ១រោច ខែអស្សុជ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹងថ្ងៃទី៣ ខែតុលា ឆ្នាំ២០២០ លោក ប្រាក់ វិចិត្រ ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកមណ្ឌលសីមា បានអោយ លោកស្រី គង់ វាសនា អនុប្រធានគណៈកម្មាធិការអនុសាខាកាកបាទក្រហមកម្ពុជា ស្រុក និងក្រុមការងារ អញ្ជើញទទួលទេយ្យទាន ជាគ្រឿងឧបភោគបរិភោគ មួយចំនួន ពីព្រះតេជគុណ វង្ស វុទ្ធី ចៅអធិការវត្ត សមុទ្ធារាម ហៅវត្តប៉ាក់ខ្លង ស្ថិតនៅ ឃុំប៉ាក់ខ្លង ស្រុកមណ្ឌលសីមា ខេត្តកោះកុង ។
មានសង្ឃដីកានាឱកាសនោះ ព្រះតេជគុណ វង្ស វុទ្ធី ចៅអធិការវត្ត សមុទ្ធារាម និងព្រះសង្ឃក្នុងវត្ត មានការគាំទ្រ និងមានទឹកព្រះទ័យរីករាយ ចូលរួមចំណែកជាមួយសកម្មភាព មនុស្សធម៌របស់កាកបាទក្រហមកម្ពុជា ក្នុងការជួយសង្គ្រោះ ក៏ដូចជាជួយសម្រាលទុក្ខលំបាករបស់ញោមញាតិទីទ័លក្រនៅគ្រប់ទីកន្លែង ។
ក្នុងឱកាសនោះដែរ ក្រុមការងារអនុសាខាស្រុកបាន ថ្លែងអំណរព្រះគុណ ចំពោះព្រះទ័យដ៏សប្បុរសធម៌របស់ព្រះតេជគុណ និងព្រះសង្ឃគ្រប់អង្គ ក្នុងការយកព្រះទ័យទុកដាក់ប្រទាននូវទេយ្យទាន គ្រឿងឧបភោគបរិភោគ នេះ សបញ្ជាក់ពីព្រះទ័យដ៏មនុស្សធម៌ ចំពោះបងប្អូនប្រជាពលរដ្ឋរងគ្រោះ និងងាយរងគ្រោះ ។ ក្នុងកាយវិកាដ៏មនុស្សធម៌នេះ គឺជាការចូលរួមរបស់ព្រះសង្ឃក្នុងវិស័យអាណាចក្រ ជាមួយសកម្មភាពមនុស្សធម៌របស់ កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន។
គ្រឿងឧបភោគបរិភោគទាំងនេះ អនុសាខាកាកបាទក្រហមកម្ពុជា ស្រុកមណ្ឌលសីមា នឹងយកទៅប្រើប្រាស់ឲ្យចំគោលដៅមនុស្សធម៌ នៅពេលដែលប្រជាពលរដ្ឋយើងទទួលរងនូវគ្រោះមហន្តរាយផ្សេងៗ ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាកាកបាទក្រហម អឌ្ឍចន្ទក្រហម។
ទេយ្យទានដែលអនុសាខាបានទទួលរួមមាន៖ អង្ករ ២៧៥ គក្រ ស្ករស ១៥ គក្រ តែ ២០កញ្ចប់ ទឹកត្រី ៣កេស ត្រីខកំប៉ុង ០៦ឡូ ទឹកស៊ីអ៉ីវ ០៣យួរ មីម៉ាម៉ា ១០ កេស ទឹកដោះគោឆៅ ០១ឡូ ប្រេងសណ្តែក០៧ដប ទឹកក្រូច០១កេស និង៣យួរ ប៊ីចេង ០២ គក្រ ខ្ទឹមស ០.៥ គក្រ អំបិល០២ គក្រ ទឹកសុទ្ធ១២០យួរ ព្រមទាំងថវិការបស់ព្រះតេជគុណ ប៉ែន វណ្ណា ចំនួន៥០០.០០០រៀលផងដែរ។
