លោកស្រី អុី នារីនេត អភិបាលរង នៃគណៈអភិបាលខេត្តកោះកុង បានអញ្ជេីញជាអធិបតីក្នុងពិធីប្រកាសបិទផ្សាយជាសាធារណៈនូវឯកសារនៃការវិនិច្ឆ័យ ចំនួន ១ភូមិ នៅភូមិវាលត្បូង ឃុំស្រែអំបិល ស្រុកស្រែអំបិល ខេត្តកោះកុង
លោកស្រី អុី នារីនេត អភិបាលរង នៃគណៈអភិបាលខេត្តកោះកុង បានអញ្ជេីញជាអធិបតីក្នុងពិធីប្រកាសបិទផ្សាយជាសាធារណៈនូវឯកសារនៃការវិនិច្ឆ័យ ចំនួន ១ភូមិ នៅភូមិវាលត្បូង ឃុំស្រែអំបិល ស្រុកស្រែអំបិល ខេត្តកោះកុង។
ថ្លែងក្នុងពិធីនេះ លោកស្រីអភិបាលរងខេត្ត បានមានប្រសាសន៍ថា ថ្ងៃនេះគឺជាការជួបជុំលើកទី២ ជាកិច្ចប្រជុំផ្សព្វផ្សាយស្តីពីការបិទផ្សាយជាសាធារណៈ នូវឯកសារនៃការវិនិច្ឆ័យ បន្ទាប់ពីការជួបជុំលើកទី១ នៅសាលាឃុំស្រែអំបិល កាលពីថ្ងៃទី៣០ ខែកញ្ញា ឆ្នាំ២០២២ ហើយយើងធ្វើប្រតិបត្តិការបច្ចេកទេស ដើម្បីប្រមូលទិន្នន័យ ដែលមានការកំណត់ព្រំ វាស់វែង និងវិនិច្ឆ័យរួច កសាងជាឯកសារនៃការវិនិច្ឆ័យមានប្លង់សុរិយោដី និងបញ្ជី ឈ្មោះម្ចាស់ដីដែលយើងនឹងដាក់ជូនសាធារណជន ដើម្បីពិនិត្យតវ៉ាចាប់ពីថ្ងៃបិទផ្សាយតទៅដែលមានរយៈពេល ១៥ថ្ងៃ។ ដំណើរការការងារចុះបញ្ជីដីធ្លីមានលក្ខណៈជាប្រព័ន្ធនេះ ត្រូវបានកំណត់ នីតិវិធីច្បាស់លាស់ ក្នុងអនុក្រឹត្យលេខ ៤៦អនក្រ.បក ចុះថ្ងៃទី៣១ ខែឧសភា ឆ្នាំ២០០២ របស់ រាជរដ្ឋាភិបាលកម្ពុជាស្តីពីនីតិវិធីនៃការកសាងប្លង់សុរិយោដី និងសៀវភៅគោលបញ្ជីដីធ្លី និងសេចក្ដីណែនាំលេខ០០១ ដនស/សដ ចុះថ្ងៃទី១៩ ខែសីហា ឆ្នាំ២០០២ របស់ក្រសួងរៀបចំ ដែនដី នគរូបនីយកម្ម និងសំណង់ សម្រាប់តំបន់វិនិច្ឆ័យ ដែលចែកជា ៥ដំណាក់កាលរួមមាន៖
១.ដំណាក់កាលត្រៀមរៀបចំកំណត់តំបន់ធ្វេីការវិនិច្ឆ័យ ការបង្កើតគណៈកម្មការរដ្ឋបាល និងផ្ដល់ពត៌មាន ជូនប្រជាពលរដ្ឋអំពីដំណើរការចុះបញ្ជីដីធ្លីដែលមានលក្ខណៈជាប្រព័ន្ធ
២.ដំណាក់កាលប្រតិបត្តិការបច្ចេកទេសគឺ ការចុះស្រង់ទិន្នន័យការកសាងប្លង់សុរិយោដី និងការចុះបញ្ជីឈ្មោះម្ចាស់ដី
៣.ដំណាក់កាលបិទផ្សាយជាសាធារណៈនូវឯកសារវិនិច្ឆ័យ ដើម្បីបង្ហាញ ជូនប្រជាពលរដ្ឋ នៃលទ្ធផលនៃការកសាងប្លង់សុរិយោដី និងបញ្ជីឈ្មោះម្ចាស់ដីដើម្បីផ្ទៀងផ្ទាត់ឈ្មោះ ស្ថានភាពគ្រួសារ និងក្បាលដីរបស់ខ្លួនព្រមទាំងធ្វើការតវ៉ាក្នុងករណីមានការខុសឆ្គង
៤.ដំណាក់កាលសម្រេចលើឯកសារវិនិច្ឆ័យ គឺការធ្វើរបាយការណ៍ពីលទ្ធផលនៃការបិទ ផ្សាយជាសារណៈ នូវឯកសានៃការវិនិច្ឆ័យរបស់គណៈកម្មការរដ្ឋបាល ជូនរដ្ឋបាល ខេត្តកោះកុង ដើម្បីពិនិត្យ និងសម្រេច
៥.ដំណាក់កាលនៃការចេញវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋ។
ដើម្បីសម្រេចឱ្យបាននូវគោលបំណងចុងក្រោយ គឺកសាងបានប្លង់សុរិយោដី សៀវភៅ គោលបញ្ជីដីធ្លី និងការចេញប័ណ្ណកម្មសិទ្ធិឱ្យបានត្រឹមត្រូវ សូមបងប្អូនទាំងអស់ និងអស់លោក លោកស្រីជាតំណាងអង្គភាព ជាម្ចាស់ដីរដ្ឋនៃភូមិវាលត្បូង ឃុំស្រែអំបិល ស្រុកស្រែអំបិល សូម អញ្ជើញចូលរួមមកពិនិត្យទិន្នន័យក្បាលដីរបស់ខ្លួន ឬក្បាលដីពាក់ព័ន្ធ ក្នុងរយៈពេលបិទផ្សាយ ១៥ថ្ងៃនេះកុំបីអាក់ខាន។ មន្ត្រីជំនាញ និងតំណាងគណៈកម្មការរដ្ឋបាល នឹងនៅប្រចាំការបំពេញ ការងាររបស់ខ្លួនទាំងថ្ងៃសៅរ៍-អាទិត្យ ឬថ្ងៃបុណ្យនៅទីនេះរហូតរយៈពេល១៥ថ្ងៃ តាមការកំណត់ ដើម្បីធ្វើការជូន។ ចំពោះរាល់បញ្ហាដែលកើតមានគណៈកម្មការរដ្ឋបាលនឹងព្យាយាមដោះស្រាយ ដើម្បីសម្រេចឱ្យបាននូវការព្រមព្រៀងរវាងភាគីវិវាទ។ ក្នុងករណីវិវាទ ឬវិវាទណាមួយដែលមិន អាចដោះស្រាយបានក្នុងរយៈពេល១៥ថ្ងៃ គណៈកម្មការរដ្ឋបាលនឹងបញ្ជូនសំណុំរឿងវិវាទនេះ ទៅគណៈកម្មការសុរិយោដីថ្នាក់ជាតិ៕
ថ្ងៃពុធ ១២កើត ខែបុស្ស ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី៣១ ខែធ្នូ ឆ្នាំ២០២៥
