រដ្ឋបាលខេត្តកោះកុង

លោក ឡៅ ប៊ុនខេង អភិបាលរង នៃគណៈអភិបាលខេត្ត បានអញ្ជើញដឹកនាំកិច្ចប្រជុំសម្របសម្រួល រវាងរដ្ឋបាលឃុំកោះស្តេច និងរតនាគារខេត្ត លើគម្រោងសាងសង់សាលារៀនធ្វើអំពីថ្ម ១ខ្នង ៣បន្ទប់ ស្ថិតនៅក្នុងភូមិព្រែកស្មាច់ ឃុំកោះស្តេច ដោយប្រើមូលនិធិឃុំឆ្នាំ២០២៥។
កិច្ចប្រជុំនេះ មានការចូលរួមពីលោក វ៉ែន សុខា នាយករង រដ្ឋបាលសាលាខេត្ត តំណាងទីចាត់ការផែនការ និងវិនិយោគ ទីចាត់ការហិរញ្ញវត្ថុ មន្ទីរអប់រំ យុវជន និងកីឡា រដ្ឋបាលស្រុកគិរីសាគរ និងតំណាងក្រុមហ៊ុន ក្នុងគោលបំណងដោះស្រាយលើបញ្ហាគម្រោងមូលនិធិឃុំកោះស្តេច ឆ្នាំ២០២៥ ដោយគម្រោងបានដាក់ដេញថ្លៃកាលពីថ្ងៃទី២៩ ខែកក្កដា ឆ្នាំ២០២៥ និងមានក្រុមហ៊ុន ជា សឿន ជាក្រុមហ៊ុនដែលបានដាក់ដេញថ្លៃឈ្នះ តែមិនអាចចុះកិច្ចសន្យា ដោយសារខាងរតនាគារខេត្ត បញ្ជាក់ថាខុសនីតិវិធី ដោយសារប្រើប្រាស់ថវិកាឃុំ តែអនុវត្តការសាងសង់សាលារៀនលើដី របស់មន្ទីរអប់រំ យុវជន និងកីឡា។ ជាលទ្ធផល ដោយសារគម្រោងបានដេញថ្លៃរួចរាល់ និងការសម្របសម្រួលពីរដ្ឋបាលខេត្ត ដូច្នេះរតនាគារខេត្ត បញ្ជាក់ថា អាចឱ្យរដ្ឋបាលឃុំកោះស្តេច ចុះកិច្ចសន្យា ជាមួយក្រុមហ៊ុន ដើម្បីអនុវត្តបានក្នុងឆ្នាំ២០២៥នេះ។
ថ្ងៃចន្ទ ៦កើត ខែកត្តិក ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៧ ខែតុលា ឆ្នាំ២០២៥