រដ្ឋបាលខេត្តកោះកុង

លោក សុខ ចេង អភិបាលរង នៃគណៈអភិបាលខេត្តកោះកុង តំណាងលោកជំទាវអភិបាលខេត្ត រួមទាំងលោកនាយករដ្ឋបាលសាលាខេត្ត លោកប្រធានអង្គភាពច្រកចេញចូលតែមួយ បានដឹកនាំ និងចូលរួមកិច្ចប្រជុំពិនិត្យវឌ្ឍនភាព និងបញ្ហាប្រឈម ពាក់ព័ន្ធនឹងការផ្តល់សេវារដ្ឋបាលរយៈពេល៩ខែ ឆ្នាំ២០២៥ របស់អង្គភាពច្រកចេញចូលតែមួយរាជធានី ខេត្ត។

នៅសាលប្រជុំបាត់ដំបង ក្រសួងមហាផ្ទៃ មានរៀបចំពិធិបើកកិច្ចប្រជុំស្តីពីការពិនិត្យវឌ្ឍនភាព និងបញ្ហាប្រឈមពាក់ព័ន្ធ និងការផ្តល់សេវារដ្ឋបាលរយៈពេល៩ខែ ឆ្នាំ២០២៥ ដើម្បីឆ្លុៈបញ្ជាំងលើការផ្តល់សេវារដ្ឋបាលនៅអង្គភាពច្រកចេញចូលតែមួយក្នុងគោលបំណងធ្វើអោយប្រសើរឡើងក្នុងការផ្តល់សេវា។

ពិធីនេះមានការអញ្ជើញចូលរួមលោក
លោកស្រី អភិបាលរងខេត្ត លោក លោកស្រី នាយករដ្ឋបាល និងលោក លោកស្រី ប្រធានអង្គភាពច្រកចេញចូលតែមួយ រាជធានី ខេត្ត និងអ្នកពាក់ព័ន្ធផ្សេងៗ សរុបប្រមាណ ១៥០នាក់។

ថ្លែងក្នុងពិធីនេះ ឯកឧត្តមអគ្គនាយករដ្ឋបាល ក្រសួងមហាផ្ទៃ មានប្រសាសន៍ថា គោលបំណងនៃសិក្ខាសាលានេះគឺដើម្បីបង្ហាញអំពីលទ្ធផលការងារដែលសម្រេចបានក្នុងឆ្នាំ២០២៥ នៃការផ្តល់សេវារបស់អង្គភាពច្រកចេញចូលតែមួយរាជធានីខេត្ត ដោយមានលទ្ធផលដូចជា ខេត្តកែប បានផ្តល់សេវាតិចជាងគេ រាជធានីភ្នំពេញ ផ្តល់សេវាបានច្រើនជាងគេ ហើយក្នុងនោះខេត្ត ដែលផ្តល់សេវាតាមអនឡាញបានច្រើនជាងគេគឺខេត្តកណ្តាល។ ដោយក្នុងនោះលោកប្រធាននាយកដ្ឋានមុខងារ និងធនធាន បានប្រកាសពីគោលការណ៍របស់ក្រសួងមហាផ្ទៃនឹងដាក់អោយអង្គភាពច្រកចេញចូលតែមួយរាជធានី ខេត្ត មានការប្រឡងប្រណាំងក្នុងការផ្តល់សេវា ដោយមានពានរង្វាន់ផងដែរ។

ជាចុងក្រោយ ឯកឧត្តមបានស្នើសូមដល់ក្រសួង ស្ថាប័នពាក់ព័ន្ធ ពិសេស រដ្ឋបាលថ្នាក់ក្រោមជាតិ និងមន្ត្រីពាក់ព័ន្ធទាំងអស់ដែលមានវត្តមានក្នុងសិក្ខាសាលានេះ សូមចូលរួម និងខិតខំជជែកពិភាក្សាអំពីបញ្ហាប្រឈម និងដំណោះស្រាយនានា ដែលលទ្ធផលនៃសិក្ខាសាលានេះនឹងក្លាយជាធាតុចូលយ៉ាងសំខាន់សម្រាប់ក្រសួងមហាផ្ទៃ បន្តពង្រឹង និងកែលម្អលិខិតបទដ្ឋានគតិយុត្ត និងគោលការណ៍ថ្មីៗដើម្បីអោយការអនុវត្តកាន់តែមានស័ក្តិសិទ្ធភាព និងប្រសិទ្ធភាព។
ថ្ងៃចន្ទ ៦រិច ខែអស្សុច ឆ្នាំម្សាញ់ សប្តស័ក ពុទ្ធសករាជ ២៥៦៨ ត្រូវនឹងថ្ងៃទី១៣ ខែតុលាឆ្នាំ២០២៥