រដ្ឋបាលខេត្តកោះកុង

ដោយយោងតាមស្ថានភាពអាកាសធាតុអំណោយផល លោក ក្រូច បូរីសីហា អភិបាល នៃគណៈអភិបាលស្រុកបូទុមសាគរ បានចាត់ក្រុមការងារស្រុក អាជ្ញាធរឃុំអណ្ដូងទឹក ឃុំថ្មស និងមេភូមិ សហការជាមួយនិងក្រុមហ៊ុន បូទុម សាគរ អេនើជី ឯ.ក ចុះពិនិត្យស្ថានភាពផ្លូវដែលមានការខូចខ្លាំងពីចំណុចភូមិជីត្រេះ ឃុំអណ្តូងទឹក “ពីចំណុចបំបែកផ្លូវជាតិលេខ៤៨-៥ វិថីសាយភូថង គីឡូម៉ែត្រលេខ៩” រហូតដល់ឃុំថ្មស ស្រុកបូទុមសាគរ ខេត្តកោះកុង។ ដោយសង្កេតឃើញថាស្ថានភាពផ្លូវជាក់ស្តែងមានការខូចខ្លាំងក្នុងមួយរយៈពេលក្រោយនេះ លំបាកក្នុងការធ្វើ ដំណើរចេញចូលរបស់ប្រជាពលរដ្ឋ បណ្តាលមកពី អំឡុងពេលនេះ ជារដូវវស្សា មានភ្លៀងធ្លាក់ផង ណាមួយបច្ចុប្បន្នក្នុងឃុំថ្មស កំពុងដំណើរសាងសង់រោងចក្រអគ្គិសនី ដើរដោយឧស្ម័នធម្មជាតិ របស់ក្រុមហ៊ុន រ៉ូយ៉ាល់ គ្រុប ខូ អិលធីឌី មានរថយន្តដឹកសម្ភារសម្រាប់ធ្វើការសាងសង់។
ក្នុងការចុះពិនិត្យជាក់ស្ដែង និងអាកាសធាតុអំណោយផល ផ្លូវមានសភាពស្ងួត ក្រុមការងារស្រុក និងក្រុមហ៊ុន បូទុម សាគរ អេនើជី ឯ.ក បានធ្វើការជួសជុល ឈូសឆាយកិនពង្រាប កន្លែងដែលរងការខូចខាត ដើម្បីជួយសម្រួលដល់ការធ្វើចរាចរណ៍ដល់ប្រជាពលរដ្ឋទាំងក្នុងឃុំក្រៅឃុំ។

ប្រភព:រដ្ឋបាលស្រុកបូទុមសាគរ

ថ្ងៃអាទិត្យ ១៣កើត ខែអស្សុជ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី៥ ខែតុលា ឆ្នាំ២០២៥