លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញទទួលស្វាគមន៍ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ក្នុងពិធីប្រកាសតែងតាំងប្រធានមន្ទីរពាណិជ្ជកម្មខេត្តកោះកុង នៅសាលប្រជុំសាខាកាកបាទក្រហមកម្ពុជា ខេត្តកោះកុង។

លោកជំទាវ បានលើកឡើងថា ដើម្បីបម្រើការផ្តល់សេវាសាធារណៈ ដល់ ថ្នាក់ក្រោមជាតិ ឲ្យកាន់តែរឹងមាំ មានប្រសិទ្ធភាពថែមទៀត ក្នុងការឆ្លើយតបទៅនឹងការពង្រឹង អភិបាលកិច្ចល្អ របស់រាជរដ្ឋាភិបាល។ វិស័យពាណិជ្ជកម្ម ត្រូវបានរាជរដ្ឋាភិបាលកម្ពុជា ចាត់ទុកជាវិស័យគន្លឹះ ដើម្បីជំរុញកំណើនសេដ្ឋកិច្ចជាតិ ដោយប្រទេសយើងសម្បូរទៅដោយធនធានធម្មជាតិ និងផលិតផល ដែលមានសក្តានុពលមិនទាន់កែច្នៃជាច្រើន សម្រាប់ធ្វើពិពិធកម្ម ការនាំចេញទៅកាន់ ទីផ្សារអន្តរជាតិ។ ជាមួយគ្នានេះផងខ្ញុំសូមថ្លែងអំណរគុណចំពោះលោក អ៊ុក សារិទ្ធិ ដែលខិតខំបំពេញការងារទទួលបានជោគជ័យគ្រប់ភារកិច្ចនាពេលកន្លងមក។ ជាមួយគ្នានេះដែរ ខ្ញុំក៏សូមចូលរួមអបអរសាទរចំពោះលោក សាលីម ហ្វារីត អនុប្រធានមន្ទីរ ដែលបានតែងតាំងជាប្រធានមន្ទីរនាពេលនេះ ខ្ញុំសង្ឃឹមថាលោកពិតជាបំពេញតួនាទី ភារកិច្ច ប្រកបដោយវិជ្ជាជីវៈ ក្នុងមុខតំណែងចាប់ពីពេលនេះតទៅ៕