រដ្ឋបាលខេត្តកោះកុង

លោក ជា ស៊ីវត្រា ប្រធានមន្ទីរផែនការខេត្តកោះកុង បានអញ្ជើញចូលរួមព្រឹត្តិការណ៍អបអរសាទរទិវាប្រជាជនពិភពលោកលើកទី៣៦ ការផ្សព្វផ្សាយឯកសារជំនួយស្មារតីគោលនយោបាយ និងរបាយការណ៍ស្ដីពីស្ថានភាពប្រជាជនពិភពលោក ក្រោមអធិបតីភាពដ៏ខ្ពង់ខ្ពស់ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ នៅសណ្ឋាគារទន្លេបាសាក់២ រាជធានីភ្នំពេញ។ក្នុងពិធីឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ បានមានប្រសាសន៍ឱ្យដឹងថា ព្រឹត្តិការណ៍ពិសេសនាថ្ងៃនេះ ត្រូវបានសហការរៀបចំឡើងដោយក្រសួងផែនការ និងមូលនិធិសហប្រជាជាតិសម្រាប់ប្រជាជន (UNFPA) ប្រចាំនៅកម្ពុជាសហការគ្នារៀបចំព្រឹត្តិការណ៍បីរួមគ្នា÷ ទី១-អបអរសាទរទិវាប្រជាជនពិភពលោកលើកទី៣៦, ទី២-ប្រកាសដាក់ឱ្យប្រើប្រាស់ជាផ្លូវការនូវឯកសារជំនួយស្មារតីគោលនយោបាយស្ដីពីការរៀបចំផែនការឌីណាមិកប្រជាជនកម្ពុជាដែលកំពុងវិវត្តដើម្បីភាពធន់ប្រជាជនគ្រប់វ័យ, ទី៣- បង្ហាញពីសូចនាករគន្លឹះនៃរបាយការណ៍ស្ដីពីស្ថានភាពប្រជាជនពិភពលោកឆ្នាំ២០២៥។ ឯកឧត្តមរដ្ឋមន្ត្រី បានគូសបញ្ជាក់ថា ការរៀបចំនូវព្រឹត្តិការណ៍ទាំងបីរួមគ្នានេះ គឺក្នុងគោលបំណងដើម្បីក្រើនរំលឹកដល់ប្រជាជនគ្រប់រូប គ្រប់វ័យ គ្រប់ជាតិសាសន៍ រួមទាំងមន្ត្រីរាជការគ្រប់លំដាប់ថ្នាក់ឱ្យផ្ដោតការយកចិត្តលើបញ្ហាប្រជាជនដោយចាត់ទុកប្រជាជនជាស្នូលនៃការអភិវឌ្ឍ ឆ្លុះបញ្ចាំងអំពីបញ្ហាគន្លឹះនៃបម្រែបម្រួលប្រជាសាស្ត្រដែលជះឥទ្ធិពលដល់ការអភិវឌ្ឍសង្គម-សេដ្ឋកិច្ច និងបង្ហាញពីភាពចាំបាច់ក្នុងការរៀបចំគោលនយោបាយប្រជាជននិងអភិវឌ្ឍន៍ ដោយផ្អែកលើភស្តុតាងជាក់លាក់។

រសៀលថ្ងៃសុក្រ ១រោច ខែអាសាឍ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី១១ ខែកក្កដា ឆ្នាំ២០២៥