លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង អមដំណើរដោយលោក សុខ សុទ្ធី អភិបាលរងខេត្តកោះកុង បានអញ្ជើញចូលរួមកិច្ចប្រជុំស្តីពី លទ្ធផលការងារចុះពិនិត្យ សិក្សា និងចងក្រងឯកសារទីតាំងដីដែលប្រជាពលរដ្ឋប្រើប្រាស់ និងអាស្រ័យផលជាក់ស្តែងក្នុងភូមិសាស្ត្រខេត្តកោះកុង។ កិច្ចប្រជុំនេះ ប្រព្រឹត្តទៅនាថ្ងៃទី៣០ ខែកក្កដា ឆ្នាំ២០២០ នៅទីស្តីការក្រសួងបរិស្ថាន រាជធានីភ្នំពេញ ក្រោមអធិបតីភាព ឯកឧត្តម ស្រ៊ុន ដារិទ្ធិ រដ្ឋលេខាធិការក្រសួងបរិស្ថាន។
សមាសភាពចូលរួមកិច្ចប្រជុំមាន៖ តំណាងក្រសួងបរិស្ថាន ក្រសួងការពារជាតិ ក្រសួងសេដ្ឋកិច្ច និងហិរញ្ញវត្ថុ ក្រសួងរៀបចំដែនដី នគរូបនីយកម្ម និងសំណង់ ក្រសួងទេសចរណ៍ តំណាងរដ្ឋបាលខេត្តកោះកុង តំណាងរដ្ឋបាលក្រុង ស្រុកទាំង៧ នៃខេត្តកោះកុង និងមន្ទីរ អង្គភាពពាក់ព័ន្ធ។
គោលបំណងនៃកិច្ចប្រជុំនេះគឺ បង្ហាញពីលទ្ធផលការងារ បញ្ហាប្រឈម ដំណោះស្រាយ និងទិសដៅការងារបន្តរបស់អនុគណៈកម្មការទាំង៧ក្រុង ស្រុកនៃខេត្តកោះកុង ចុះពិនិត្យសិក្សាទីតាំងដីជាក់ស្តែង ដើម្បីស្នើសុំកាត់ឆ្វៀលដីដែលស្ថិតក្នុងតំបន់ការពារធម្មជាតិ និងតំបន់គម្របព្រៃឈើ ជូនប្រជាពលរដ្ឋដែលរស់នៅអាស្រ័យផលជាក់ស្តែង។