លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញចូលរួម ក្នុងកិច្ចប្រជុំត្រៀមចុះពិនិត្យ សិក្សា និងចងក្រងឯកសារទីតាំងដី ក្នុងតំបន់ការពារធម្មជាតិ និងរបៀងអភិរក្សជីវៈចម្រុះដែលប្រជាពលរដ្ឋ បានប្រើប្រាស់ និងអាស្រ័យផលជាក់ស្តែង ក្នុងភូមិសាស្ត្រខេត្តកោះកុង នៅទីស្តីការក្រសួងបរិស្ថាន។
លោកជំទាវ មិថុនា ភូថង អភិបាលខេត្តកោះកុង បានដឹកនាំមន្ត្រីក្រុមការងារខេត្តកោះកុងចូលរួមប្រជុំស្តីពីការកាត់ឆ្វៀលដីជូនប្រជាពលរដ្ឋតាមអនុសាសន៍សម្តេចតេជោ ហ៊ុន សែន នាយករដ្ឋមន្តីនៃព្រះរាជាណាចក្រកម្ពុជា នៅទីស្តីការក្រសួងបរិស្ថាន ដែលដឹកនាំដោយឯកឧត្តម ស្រ៊ុន ដារិទ្ធិ រដ្ឋលេខាធិការក្រសួងបរិស្ថាន។ សមាសភាពចូលរួមកិច្ចប្រជុំមាន តំណាងក្រសួងបរិស្ថាន ក្រសួងរៀបចំដែនដី នគរូបនីយកម្ម និងសំណង់ ក្រសួងកសិកម្ម រុក្ខាប្រមាញ់ និងនេសាទ ក្រសួងមហាផ្ទៃ ក្រសួងការពារជាតិ ក្រសួងសេដ្ឋកិច្ច និងហិរញ្ញវត្ថុ អង្គភាពប្រឆាំងអំពើពុករលួយ រដ្ឋបាលខេត្តកោះកុង និងមន្ទីរអង្គភាពពាក់ព័ន្ធ។
ក្រុមការងាររដ្ឋបាលខេត្តដែលបានចូលរួមកិច្ចប្រជុំនាពេលនោះមាន លោក សុខ សុទ្ធី អភិបាលរងខេត្តកោះកុង អភិបាលនៃគណៈអភិបាលក្រុង ស្រុកទាំង៧ ប្រធានមន្ទីរបរិស្ថាន មន្ទីររៀបចំដែនដី នគរូបនីយកម្ម សំណង់ និងសុរិយោដី ប្រធានមន្ទីរកសិកម្ម រុក្ខាប្រមាញ់ និងនេសាទ។
ក្នុងកិច្ចប្រជុំនេះ ឯកឧត្តមប្រធានអង្គប្រជុំ និងអង្គប្រជុំទាំងមូល បានពិភាក្សាគ្នាអំពី៖ ការរៀបចំក្រុមការងារ និងអនុក្រុមការងារដើម្បីចុះអនុវត្តកិច្ចការកាត់ឆ្វៀលដីជូនប្រជាពលរដ្ឋ នីតិវិធី និងវិធីសាស្ត្រក្នុងការចុះអនុវត្តការងារ៖ គឹធ្វើយ៉ាងណាដើម្បីធានាបាននូវភាពត្រឹមត្រូវ ច្បាស់លាស់ និង ផែនការអនុវត្តការងារ។
ក្នុងឱកាសនេះដែរ លោក សុខ សុទ្ធី អភិបាលរងខេត្ត ដោយបានទទួលការអនុញ្ញាត និងអនុសាសន៍ពីលោកជំទាវ អភិបាលខេត្ត បានបង្ហាញជូនអង្គប្រជុំថា រដ្ឋបាលខេត្តបានត្រៀមខ្លួនរួចជាស្រេចហើយក្នុងការអនុវត្តកិច្ចការនេះក្រោមការចង្អុលបង្ហាញនិងដឹកនាំពីលោកជំទាវអភិបាលខេត្ត។
ជារួមកិច្ចប្រជុំនេះទទួលបានលទ្ធផលដូចខាងក្រោម៖
១. ការចុះទៅអនុវត្តការងារគឺមានគោលដៅចុះទៅកាត់ឆ្វៀលដីជូនប្រជាពលរដ្ឋ និងការចុះបញ្ជីដីរដ្ឋ និងដីឯកជន
២. ការដោះស្រាយបញ្ហានានា គឺឈរលើមូលដ្ឋានច្បាប់ លិខិតបទដ្ឋានគតិយុត្តិដែលមានស្រាប់ និងគោលការណ៍ណែនាំពីក្រសួងរៀបចំដែនដី នគរូបនីយកម្ម និងសំណង់
៣. ទិសដីការងារ ចាប់ពីថ្ងៃចន្ទ ទី២០ ខែកក្កដា ឆ្នាំ២០២០ នេះទៅ ក្រុមការងារនឹងចុះទៅដល់មូលដ្ឋាន ជាប់ផ្តើមអនុវត្តការងារ ដោយអនុវត្តទៅតាមអនុក្រុមការងារនីមួយៗ។
