រដ្ឋបាលខេត្តកោះកុង

លោក អ៊ុក ភ័ក្ត្រា អភិបាលរង នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំ ស្តីពីការរៀបចំវិថីម្ហូបអាហារ ខេត្តកោះកុង ដោយមានការចូលរួមពីលោក លោកស្រីសមាជិកគណៈកម្មការរៀបចំវិថីម្ហូបអាហារ ខេត្តកោះកុង និងអ្នកពាក់ព័ន្ធសរុប ២៣ នាក់។
ក្នុងគោលបំណង ដើម្បីជំរុញការរៀបចំវិថីម្ហូបអាហារខេត្តកោះកុង ឲ្យបានលឿន និងមានភាពល្អប្រសើរតាមស្តង់ដារសូចនាករទីក្រុងស្អាត និងការលើកកម្ពស់គុណភាព នៃការផ្តល់សេវាកម្មទេសចរណ៍ក្នុងក្រុងខេមរភូមិន្ទនៃខេត្តកោះកុង។ យោងតាមការយកចិត្តទុកដាក់ និងការចង្អុលបង្ហាញពីលោកជំទាវ មិថុនា ភូថង អភិបាល នៃគណៈអភិបាលខេត្ត វិថីម្ហូបអាហារខេត្តកោះកុង គ្រោងនឹងរៀបចំនៅសួនច្បារមុខមន្ទីរទេសចរណ៍ ដោយរៀបចំជាតូប បង្គន់អនាម័យស្តង់ដារ និងចំណតរថយន្តត្រឹមត្រូវ តាមស្តង់ដារទេសចរណ៍ ដោយនឹងរក្សាបាននូវសោភ័ណភាព អនាម័យ និងអាចឲ្យអាជីវករអាចលក់ដូរពេញ១ថ្ងៃ។