លោក ប្រាក់ វិចិត្រ ប្រធានគណៈកម្មាធិការអនុសាខា កក្រក ស្រុកមណ្ឌលសីមា និងសហការី សហការជាមួយអាជ្ញាធរ មូលដ្ឋាន បានចុះសួសុខទុក្ខ ស្រ្តីសម្រាលកូនជួបការលំបាក និងគ្រួសារមានជម្ងឺ ចំនួន០៣គ្រួសារ ស្ថិតនៅភូមិកោះចាក០២គ្រួសារ .ភូមិតាចាត០១គ្រួសារ ក្នុងឃុំទួលគគីរ ស្រុកមណ្ឌលសីមា ខេត្តកោះកុង ។
នាឱកាសនោះប្រធានគណៈកម្មាធិការអនុសាខា បាន ពាំនាំនូវ ប្រសាសន៍ផ្ដាំផ្ញើសួរសុខទុក្ខពីសំណាក់ លោកជំទាវ មិថុនា ភូថង ប្រធានគណៈកម្មាធិការសាខា ជាពិសេស សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយក ចិត្តទុកដាក់គិតគូរចំពោះសុខទុក្ខប្រជាពលរដ្ឋគ្រប់រូប ដែលកំពុងជួបការ លំបាក ដោយមិនប្រកាន់វណ្ណៈ ពណ៌សម្បុរ ជំនឿ សាសនា ឬនិន្នាការនយោបាយណាមួយឡើយនិង សូមបងប្អូនទាំងអស់គ្នា ក៏ដូចជាក្រុមគ្រួសារកុំអស់សង្ឃឹម ត្រូវបន្តការថែទាំសុខភាព ហូបស្អាត ផឹកស្អាត និង រស់នៅស្អាត ។
ក្រុមការងារបានផ្សព្វផ្សាយ ណែនាំពីវិធីលាងដៃបង្ការ ជំងឺកូវីដ១៩ និង កាត់បន្ថយហានិភ័យពីការឆ្លង ជំងឺកូវីដ១៩ តាមការណែនាំរបស់ក្រសួងសុខាភិបាល និងត្រូវប្រុងប្រយ័ត្នចំពោះជំងឺគ្រុនឈាម និងយកកូនទៅចុះសំបុត្រកំណើត អោយបានទាន់ពេលវេលា។
សម្ភារដែលអនុសាខាបានផ្ដល់ជូនស្រ្តីសម្រាលកូនក្នុង១គ្រួសារៗ ទទួល បាន៖អង្ករ២៥ គក្រ ត្រីខ ១ឡូ មីម៉ាម៉ា១កេស ទឹកសុទ្ធវីតាល១កេស ទឹកដោះគោឆៅ០១ឡូ គ្រឿងឧបភោគបរិភោគ០១កញ្ចប់ និងថវិកា១០០.០០០រៀល ។ដោយឡែកគ្រួសារមានជម្ងឺអនុសាខាបានឧបត្ថម្ភថវិកា២០០.០០០រៀល និងលោកស្រីមេឃុំទួលគគីរជួយឧបត្ថម្ភ៤០.០០០រៀល ផងដែរ។
