លោក ផៃធូន ផ្លាមកេសន អភិបាលស្តីទី ខេត្តកោះកុង បានអញ្ជើញដឹកនាំកិច្ចប្រជុំ ពិភាក្សា ស្តីពីការផ្ទុកលើសទម្ងន់របស់រថយន្តដឹកជញ្ជូនធុនធ្ងន់ លើកំណាត់ផ្លូវលេខ ៤៨ នៃក្រុមហ៊ុនដឹកជញ្ជូន ក្នុងខេត្តកោះកុង ដោយមានការចូលរួមពី លោកអភិបាលរងខេត្ត លោក លោកស្រី ប្រធានមន្ទីរអង្គភាព លោកអភិបាល អភិបាលរង ក្រុង ស្រុក និងអ្នកពាក់ព័ន្ធនានា។
លោកអភិបាលស្តីទី បានលើកឡើងថា ក្នុងរដូវវស្សា មានភ្លៀងធ្លាក់ជាប្រចាំ ដូច្នេះក្រុមហ៊ុន ដឹកជញ្ជូនទាំងអស់ត្រូវគោរពតាមគោលការណ៍ច្បាប់ ជៀសវាងការដឹកលើសទម្ងន់នាំអោយខួចខាតផ្លូវ និងប៉ះពាល់ដល់សុវត្ថិភាពសាធារណៈ ជាមួយគ្នានេះផងដែរ សូមមន្ទីរ អង្គភាពជំនាញពាក់ព័ន្ធ ជម្រុញការអនុវត្តច្បាប់ អោយបានទៀងទាត់ និងជាប្រចាំ ចូលរួមក្នុងការអនុវត្តទាំងអស់គ្នា ដើម្បីកាត់បន្ថយគ្រោះថ្នាក់ចរាចរ។
