លោកជំទាវ មិថុនា ភូថង អភិបាល នៃគណៈអភិបាលខេត្តកោះកុង ថ្លែងក្នុងពិធីបោទ វេទិកា ស្តីពី«កំណែទម្រង់វិមជ្ឈការ និងវិសហមជ្ឈការ»
លោកជំទាវអភិបាលខេត្ត បានលើកឡើងថា ជាថ្មីម្តងទៀត នាងខ្ញុំសូមសម្តែងនូវអំណរគុណចំពោះវត្តមានរបស់ ឯកឧត្តម លោកជំទាវ អស់ លោក លោកស្រី ទាំងអស់ ដែលបានចំណាយពេលវេលាដ៏មានតម្លៃអញ្ជើញចូលរួម ក្នុងវេទិការវាង រាជរដ្ឋាភិបាលនិងរដ្ឋបាលថ្នាក់ក្រោមជាតិស្តីពី «កំណែទម្រង់វិមជ្ឈការ និងវិសហមជ្ឈការ ដើម្បីចូល រួមសម្រេចបានចក្ខុវិស័យកម្ពុជា ឆ្នាំ២០៥០» អស់រយៈពេល១ថ្ងៃកន្លះ កន្លងមកនេះ។
ខ្ញុំសូមជម្រាបជូនអង្គវេទិកាទាំងមូលមេត្តាជ្រាបថា ក្រោយពីដំណើការអង្គវេទិការរយៈពេលមួយ ថ្ងៃកន្លះមកនេះ យើងទទួលបានលទ្ធផលជាផ្លែផ្កាគួរជាទីមោទន ស្របតាមផែនការ និងរបៀបវារៈដែល បានគ្រោងទុក។ តាមរយៈការធ្វើបទអន្តរាគមន៍ លើប្រធានបទសំខាន់ៗ ដែលបានឡើងបង្ហាញដោយ រដ្ឋបាលឃុំ-សង្កាត់ ក្រុង-ស្រុក មន្ទីរ-អង្គភាពពាក់ព័ន្ធ សមាគមក្រុមប្រឹក្សាថ្នាក់មូលដ្ឋាន សហគមន៍ និងអង្គការសង្គមស៊ីវិល ដែលបាននិងកំពុងប្រតិបត្តិការនៅក្នុងខេត្ត បានបង្ហាញឲ្យយើងឃើញថា អង្គភាពពាក់ពន្ធ័នៅរដ្ឋបាលថ្នាក់ក្រោមជាតិ នៃខេត្តកោះកុង មានការយល់ដឹងច្រើន អំពី ដំណើរការ និងសារៈសំខាន់ នៃការងារកំណែទម្រង់វិមជ្ឈការ និងវិសហមជ្ឈការនៅថ្នាក់ក្រោមជាតិ។
ផ្អែកតាមលទ្ធផលនៃកិច្ចប្រជុំថ្នាក់ឃុំ សង្កាត់ និងកិច្ចប្រជុំថ្នាក់ក្រុង ស្រុក និងរដ្ឋបាលខេត្ត តាមរយៈក្រុមការងារបច្ចេកទេសថ្នាក់ខេត្ត យើងទទួលបានសំណើ សំណូមពរ និងបញ្ហាប្រឈមមួយ ចំនួនដូចខាងក្រោម ៖
*នៅរដ្ឋបាលឃុំ សង្កាត់ មានចំនួន ១៨ បញ្ហាប្រឈម
*នៅរដ្ឋបាលក្រុង ស្រុក មានចំនួន ១៨ បញ្ហាប្រឈម និង
*ថ្នាក់ខេត្ត មានចំនួន ១៥ បញ្ហាប្រឈម
បញ្ហាប្រឈមសរុបមានចំនួន ៥១ ត្រូវបានដាក់ជូនពិភាក្សា រកដំណោះស្រាយ ក្នុងអង្គវេទិការបស់យើង និងមានការចូលរួមយ៉ាងផុលផុសពីសមាជិក សមាជិកា នៃអង្គវេទិការ ជាលទ្ធផលយើង ទទួលបានដូចខាងក្រោម ៖
*បញ្ហាប្រឈមរបស់រដ្ឋបាលឃុំ-សង្កាត់ ដែលមាន ១៨ករណី ត្រូវបានដោះស្រាយដោយ រដ្ឋបាលខេត្តបានចំនួន១១ករណី និង ស្នើទៅថ្នាក់ជាតិដើម្បីពិនិត្យដោះស្រាយ ចំនួន ០៧ករណី។
*បញ្ហាប្រឈមរបស់រដ្ឋបាលក្រុង ស្រុក ដែលមាន ១៨ករណី ត្រូវបានដោះស្រាយដោយ រដ្ឋបាលខេត្តបានចំនួន១៣ករណី និងស្នើទៅថ្នាក់ជាតិដើម្បីពិនិត្យដោះស្រាយចំនួន០៥ ករណី។
*បញ្ហាប្រឈមរបស់រដ្ឋបាលខេត្ត ដែលមាន១៥ករណី ត្រូវបានពិនិត្យដោះស្រាយនៅ កម្រិតខេត្តផ្ទាល់បាន ចំនួន១២ករណី និងស្នើទៅថ្នាក់ជាតិពិនិត្យដោះស្រាយ ចំនួន ០៣ករណី។
ដូច្នេះ បញ្ហាប្រឈមដែលបានលើកឡើង រដ្ឋបាលខេត្ត ដោះស្រាយបានចំនួន៣៦ករណី ហើយ បញ្ហាដែលត្រូវស្នើអន្តរាគមន៍ដោះស្រាយទៅថ្នាក់ជាតិមានចំនួន១៥ករណី។
ត្រង់ចំណុចនេះ ក្នុងនាមរដ្ឋបាលខេត្ត នាងខ្ញុំស្នើដល់មន្ទីរ-អង្គភាពពាក់ព័ន្ធ និងរដ្ឋបាល ក្រុង-ស្រុកត្រូវបន្តយកចិត្តទុកដាក់ ដោះស្រាយនូវបញ្ហាប្រឈមនានា ដែលអង្គវេទិការនាពេលនេះបាន ដាក់ចេញ ដោយត្រូវរៀបចំផែនការសកម្មភាព និងកំណត់ក្របខណ្ឌពេលវេលាដោះស្រាយ ឬអន្តរាគមន៍ ឲ្យទទួលបានប្រសិទ្ធភាពខ្ពស់។ ជាមួយគ្នានេះ សូមលោក ស្រេង ហុង អភិបាលរងខេត្ត និងលោកនាយករដ្ឋបាលសាលាខេត្ត ត្រូវបន្តដឹកនាំក្រុមការងារបច្ចេកទេសថ្នាក់ខេត្ត រៀបចំរបាយការណ៍ ស្តីពី លទ្ធផលនៃអង្គវេទិកា ជូនលេខាធិការដ្ឋាន គ.ជ.អ.ប ដោយបញ្ជាក់ឱ្យបានច្បាស់លាស់ អំពី បញ្ហាប្រឈមនានា ដែលពុំស្ថិតនៅក្រោមដែនសមត្ថកិច្ចរបស់រដ្ឋបាលខេត្ត អាចដោះស្រាយបាន។
ឆ្លៀតក្នុងឱកាសដ៏វិសេសវិសាលនេះ ក្នុងនាមរដ្ឋបាលខេត្ត សូមគោរពថ្លែងអំណរគុណជាអនេកកប្បការ ចំពោះសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដែលបានប្តេជ្ញា បន្តគាំទ្រ អនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការ ក្នុងដំណើរការ ផ្ទេរធនធាន និងមុខងារ មករដ្ឋបាលថ្នាក់ក្រោមជាតិ តាមរយៈគណៈកម្មាធិការជាតិសម្រាប់ការអភិវឌ្ឍ តាមបែបប្រជាធិបតេយ្យនៅថ្នាក់ក្រោមជាតិ និងសូមគោរពថ្លែងអរគុណជូនចំពោះ ឯកឧត្តម អភិសន្តិ បណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងថ្នាក់ដឹកនាំ ក្រសួងមហាផ្ទៃ គ្រប់លំដាប់ថ្នាក់ ដែលតែងតែគាំទ្រ ណែនាំ តម្រង់ទិសជាប់ជាប្រចាំដល់រដ្ឋបាលថ្នាក់ក្រោមជាតិទាំងអស់ នៅទូទាំង ប្រទេសឱ្យខិតខំប្រឹងប្រែងអនុវត្តតួនាទីភារកិច្ច និងមុខងារ ស្របតាមច្បាប់ ស្តីពី ការគ្រប់គ្រងរដ្ឋបាល ខេត្ត និងលិខិតបទដ្ឋានគតិយុត្តិនានា ។នាងខ្ញុំមានសង្ឃឹមយ៉ាងមុតមាំថា ក្រសួង ស្ថាប័នផ្សេងៗទៀត នឹងបន្តប្តេជ្ញាគាំទ្រការអនុវត្តគោលនយោបាយកំណែទម្រង់វិមជ្ឈការ និងវិសហមជ្ឈការទាំងអស់គ្នា សំដៅដល់ដំណើរការផ្ទេរធនធាន និងមុខងារ មករដ្ឋបាលថ្នាក់ក្រោមជាតិ ដើម្បីឱ្យរដ្ឋបាលថ្នាក់ក្រោម ជាតិ ជាពិសេសគឺរដ្ឋបាលក្រុង ស្រុក និងឃុំ សង្កាត់ ប្រែក្លាយទៅជា «រដ្ឋបាលមូលដ្ឋាន» ដែលមាន ស្វ័យភាព សមត្ថភាព និងការទទួលខុសត្រូវលើការផ្តល់សេវានានា ដោយផ្ទាល់ជូនប្រជាពលរដ្ឋ ក្នុងដែនសមត្ថកិច្ចរបស់ខ្លួនឱ្យកាន់តែល្អប្រសើរ។
ទន្ទឹមនេះ នាងខ្ញុំក៏សូមសំណូមពរដល់ រដ្ឋបាល ក្រុង-ស្រុក និងឃុំ សង្កាត់ ដែលត្រូវបាន កំណត់ថា «ជារដ្ឋបាលមូលដ្ឋាន» ត្រូវបន្តយកចិត្តទុកដាក់ខ្ពស់តាមដានក្របខណ្ឌគោលនយោបាយ របស់រាជរដ្ឋាភិបាល និងលិខិតបទដ្ឋានគតិយុត្តិនានា របស់ក្រសួងស្ថាប័ន ដែលបានដាក់ចេញឱ្យអនុវត្តពាក់ព័ន្ធទៅនឹងកិច្ចការកំណែទម្រង់វិមជ្ឈការ និងវិសហមជ្ឈការ ដើម្បីពង្រឹង និងពង្រីកសមត្ថភាព អង្គភាពរបស់ខ្លួនជាប្រចាំ ដើម្បីបង្ហាញថារដ្ឋបាលមូលដ្ឋាន មានសមត្ថភាពក្នុងការអនុវត្តមុខងារដែល រាជរដ្ឋាភិបាល ក្រសួង ស្ថាប័ននៅថ្នាក់ជាតិ បានធ្វើវិមជ្ឈការ និងវិសហមជ្ឈការមករដ្ឋបាលថ្នាក់ ក្រោមជាតិ ប្រកបដោយប្រសិទ្ធិភាព និងប្រសិទ្ធិផល។
ជាទីបញ្ចប់ នាងខ្ញុំសូមថ្លែងអំណរគុណចំពោះ ឯកឧត្តមប្រធានក្រុមប្រឹក្សាខេត្ត ឯកឧត្តម លោកជំទាវ លោក លោកស្រី គណៈអធិបតី និងអង្គពិធីទាំងមូល ដែលបានចំណាយពេលវេលាដ៏មាន តម្លៃអញ្ជើញចូលរួមក្នុងវេទិការ រយៈពេល១ថ្ងៃ កន្លះ ប្រកបដោយការយកចិត្តទុកដាក់ និងសូមគោរព ជូនពរ ឯកឧត្តម លោកជំទាវ លោក លោកស្រី ក្មួយៗ និងអង្គពិធីទាំងមូល សូមទទួលបានជោគជ័យ គ្រប់ភារកិច្ច និងសូមជួបប្រទះនូវពុទ្ធពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ នឹងសូមប្រកាសបិទ វេទិការវាងរាជរដ្ឋាភិបាលនិងរដ្ឋបាលថ្នាក់ក្រោមជាតិ ស្តីពី « កំណែទម្រង់ វិមជ្ឈការ និងវិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជា ឆ្នាំ២០៥០» នៅខេត្តកោះកុង ចាប់ពីពេលនេះតទៅ។ សូមគោរពអរគុណ!
ថ្ងៃសុក្រ ៦កើត ខែមិគសិរ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៦ ខែធ្នូ ឆ្នាំ២០២៤
