លោក អន សុធារិទ្ធ អភិបាលរងខេត្ត និងជាអនុប្រធានគណៈកម្មាធិការគ្រប់គ្រងទីលានទុកដាក់សំរាម សំណល់រឹងទីប្រជុំជនខេត្តកោះកុង បានអញ្ជើញដឹកនាំកិច្ចប្រជុំពិភាក្សាជាមួយមន្ទីរជំនាញ និងរដ្ឋបាលក្រុងខេមរភូមិន្ទ រដ្ឋបាលស្រុកមណ្ឌលសីមា និងចុះពិនិត្យទីតាំងដីសម្រាប់រៀបចំអាងប្រព្រឹត្តិកម្មទឹកកខ្វក់ និងទីតាំងដីគ្រោងទីលានទុកដាក់សំរាម សំណល់រឹងទីប្រជុំជនខេត្តកោះកុង។ ក្រោយកិច្ចប្រជុំ ក្រុមការងារបានចុះពិនិត្យទីតាំងជាក់ស្តែង និងជាលទ្ធផល: ១: ទីតាំងដីអាងប្រព្រឹត្តិកម្មទឹកកខ្វក់ មានទំហំសរុបជាង២១ហិកតា (២១១២៤០ម៉ែត្រការ៉េ) ជាដីអាងរដ្ឋាករទឹកចាស់ មានប្លង់រឹង របស់ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ មានទីតាំងស្ថិតក្នុងសង្កាត់ស្មាច់មានជ័យ ក្រុងខេមរភូមិន្ទ។ ទីតាំងនេះមានលក្ខណៈសមស្របសម្រាប់រៀបចំអាងប្រព្រឹត្តិកម្មទឹកកខ្វក់របស់ក្រុងខេមរភូមិន្ទ និងមិនមានការអាស្រ័យផលនានាពីប្រជាជនទេ។ ២: ទីតាំងដីគ្រោងទីលានទុកដាក់សំរាម សំណល់រឹងទីប្រជុំជនខេត្តកោះកុង មានទំហំសរុប២៦៥ហិកតា ជាដីរដ្ឋគ្រប់គ្រងដោយក្រសួងបរិស្ថាន ស្ថិតនៅក្នុងភូមិកោះប៉ោ ឃុំប៉ាក់ខ្លង ស្រុកមណ្ឌលសីមា។ ទីតាំងដីនេះមានចំងាយប្រមាណ១៤គីឡូម៉ែត្រពីក្រុងខេមរភូមិន្ទ និងពីផ្លូវជាតិលេខ១០ ប្រមាណ៥គីឡូម៉ែត្រ (ត្រូវធ្វើផ្លូវចូលប្រហែល៥គីឡូម៉ែត្រ)។ ទីតាំង២កន្លែងនេះសមស្របសម្រាប់រៀបចំការអភិវឌ្ឍន៍ ក្នុងនោះរដ្ឋបាលខេត្ត នឹងដាក់សំណើសុំទៅក្រសួងបរិស្ថាន និងក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ ដើម្បីស្នើសុំប្រើប្រាស់ទីតាំងដីនេះ ជាអាងប្រព្រឹត្តិកម្មទឹកកខ្វក់ និងទីលានទុកដាក់សំរាម សំណល់រឹងស្តង់ដារ របស់ខេត្តកោះកុង។
