គណៈកម្មាធិការជាតិគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាចុះពិនិត្យស្ថានភាពករណីចាក់ដីរំលោភឆ្នេរកន្លងមក នៅភូមិស្មាច់មានជ័យ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង
រដ្ឋបាលខេត្តកោះកុង៖ ក្រុមការងារលេខាធិការដ្ឋាននៃគណៈកម្មាធិការគ្រប់គ្រងនិងអភិវឌ្ឍតំបន់ឆ្នេរសមុទ្រកម្ពុជាខេត្តកោះកុង បានចុះអមអំណើរ ឯកឧត្តម នី ផល្លី អនុរដ្ឋលេខាធិការក្រសួងទេសចរណ៍ និងជាអគ្គលេខាធិការរង គ.អ.ឆ.ក. ចុះពិនិត្យករណីរកឃើញការរំលោភឆ្នេរសមុទ្រដែលជាកម្មសិទ្ធិសាធារណៈរបស់រដ្ឋ ធ្វើជាកម្មសិទ្ធិឯកជន កន្លងមក ដោយបោះបង្គោលនិងបូមខ្សាច់លុបឆ្នេរសមុទ្រ ស្ថិតនៅភូមិស្មាច់មានជ័យ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។
ការចុះពិនិត្យនេះមានការចូលរួមពីសំណាក ១) លោក ឈេង សុវណ្ណដា អភិបាលនៃគណៈអភិបាលក្រុងខេមរភូមិន្ទ ២) លោក រស់ វីរ៉ាវុធ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកោះកុង ៣) លោក ម៉ន ផល្លា ប្រធានមន្ទីរបរិស្ថានខេត្តកោះកុង ៤) លោក ឈុន សំឃីត អនុប្រធានមន្ទីរទេសចរណ៍ខេត្តកោះកុង ៥) លោក រស់ ជីវិន ប្រធានការិយាល័យគ្រប់គ្រងការអភិវឌ្ឍនិងសំណង់ និងជាលេខាធិការនៃ លេខាធិការដ្ឋាន គ.អ.ឆ.ក. ខេត្ត ៦) លោក វិន សារ៉េត ប្រធានការិយាល័យគ្រប់គ្រងបុគ្គលិក និងជាសមាជិកនៃលេខាធិការដ្ឋាន គ.អ.ឆ.ក. ខេត្ត ៧) លោក នាម យ៉ុង ចៅសង្កាត់ស្មាច់មានជ័យ និង ៨) លោក ទុន ឌៀត ម្ចាស់ទីតាំងដី។
ជាលទ្ធផល ករណីនេះ រដ្ឋបាលខេត្តកោះកុង បានដោះស្រាយបញ្ចប់រួចរាល់ហើយតាំងពីខែឧសភា ឆ្នាំ២០២០ ដោយបានឱ្យសាមីខ្លួនកាយអាចម៍ដីចេញ និងរក្សាស្ថានភាពឆ្នេរឱ្យនៅដដែល។ ឯកឧត្តមក៏បានថ្លែងសរសើរដល់រដ្ឋបាលមូលដ្ឋានដែលបានចាត់ចែងអនុវត្តមានប្រសិទ្ធភាព និងទាន់ពេលវេលា។ បន្ថែមពីលើនេះ ក្រុមការងារបានស្នើឱ្យលោក ទុន ឌៀត ពិភាក្សាជាមួយរដ្ឋបាលមូលដ្ឋាន និងមន្ទីរជំនាញពាក់ព័ន្ធក្នុងការដាក់សំណាញ់ស្ទាក់សំរាមជៀសវាងកុំឱ្យប៉ះពាល់ដល់សោភ័ណ្ឌភាពឆ្នេរ៕
