រដ្ឋបាលស្រុកបូទុមសាគរ មានកិត្តិយសសូមជម្រាបជូនសាធារណៈជន និងបងប្អូន ប្រជាពលរដ្ឋទាំងអស់ មេត្តាជ្រាបថា កាលពីថ្ងៃទី២៨ ខែមិថុនា ឆ្នាំ២០២៤ កន្លងមកនេះសារពត៌មាន ដែលមានឈ្មោះថា SK TV បានចុះផ្សាយថា មានផ្ទះ អត់ផ្លូវដើរ គេបិទផ្លូវ អាជ្ញាធរថាជួយមិនបាននេះ យោងតាមការអះអាង ពីគ្រួសារអ្នកមីង ពុធ យឿន នៅភូមិជីត្រេះ ឃុំអណ្តូងទឹក ស្រុកបុទុមសាគរ ខេត្ត កោះកុង ក្នុងន័យនេះរដ្ឋបាលស្រុកបូទុមសាគរ សូមធ្វើការស្រាយបំភ្លឺជូនសាធារណៈជនបាន ជ្រាបថា ករណីនេះរដ្ឋបាលស្រុកបានធ្វើការសម្របសម្រួលកាលពីថ្ងៃទី២០ ខែធ្នូ ឆ្នាំ២០២៣ ហើយភាគីទាំងពីរ ឯកភាពគ្នាបើកផ្លូវ ដើម្បីបញ្ចប់រឿង។
លុះមកដល់ថ្ងៃទី០២ ខែមករា ឆ្នាំ២០២៤ ក្រុមការងារបានចុះធ្វើការវាស់វែងដល់ទីតាំង ដីជាក់ស្តែង ដែលភាគីទាំងពីរបានឯកភាពរវាងឈ្មោះ ពុធ យឿន (ដើមបណ្ដឹង) និងឈ្មោះ យ៉េត ភា (ចុងបណ្ដឹង) ប៉ុន្តែភាគីចុងបណ្ដឹងមិនព្រមបើកផ្លូវនៅទីតាំងចាស់ទេ ដោយសម្អាងថាជាដីកម្មសិទ្ធរបស់ គាត់បែរទៅឲ្យបើកផ្លូវទីតាំងខាងក្រោយវិញ។ ចំណែកភាគីដើមបណ្ដឹងស្នើឲ្យបើកផ្លូវចាស់ដដែល ហើយ ពុំព្រមទទួលយកផ្លូវខាងក្រោយនោះទេ។
សរុបសេចក្តីមក ក្រុមការងារពុំអាចធ្វើការវាស់វែង ព្រមទាំងកំណត់ផ្លូវបាននោះទេ ដោយទុកពេលឲ្យភាគីទាំងពីរពិចារណា និងធ្វើការដោះស្រាយម្តងទៀត។
អាស្រ័យដូចបានបំភ្លឺជូនខាងលើនេះ សូមសាធារណៈជន បងប្អូនប្រជាពលរដ្ឋ សូមកុំ អោយមានការភ័នច្រឡំ នូវការផ្សព្វផ្សាយ គ្មានមូលដ្ឋានច្បាស់លាស់ របស់សារពត៌មានឈ្មោះថា SK TV សូមអរគុណ។
ប្រភព:រដ្ឋបាលស្រុកបូទុមសាគរ
====================
ថ្ងៃសៅរ៍ ៨រោច ខែជេស្ឋ ឆ្នាំរោង ឆស័ក ព.ស. ២៥៦៨ ត្រូវនឹង ថ្ងៃទី២៩ ខែមិថុនា ឆ្នាំ២០២៤
