គណៈកម្មាធិការត្រួតពិនិត្យគ្រឿងញៀនខេត្ត ដែលមានលេខាធិការដ្ឋាន ជាសេនាធិការ បានម្ចាស់ការរៀបចំពិធីអបអរសាទរ ទិវាអន្តរជាតិប្រយុទ្ធប្រឆាំងគ្រឿងញៀន ២៦ មិថុនា ២០២៤ ក្រោមប្រធានបទ “រួមគ្នាវិនិយោគលើការបង្ការ ទប់ស្កាត់ និងលើកកម្ពស់ការអប់រំ ដើម្បីសហគមន៍គ្មានគ្រឿងញៀន” ស្ថិតក្រោមអធិបតីភាពដ៏ខ្ពង់ខ្ពស់ ឯកឧត្តម ថុង ណារុង ប្រធានក្រុមប្រឹក្សាខេត្ត លោកជំទាវ មិថុនា ភូថង អភិបាល នៃគណៈអភិបាលខេត្ត និងឯកឧត្តម ឧត្តមសេនីយ៍ទោ ឡេង ប៊ុនណា អគ្គលេខាធិការរង នៃអគ្គលេខាធិការដ្ឋាន នៃអាជ្ញាធរជាតិប្រយុទ្ធប្រឆាំងគ្រឿងញៀន។ ពិធីខាងលើត្រូវបានរៀបចំឡើង ក្នុងគោលបំណងបន្តបំផុសស្មារតីឲ្យចាត់ទុកគ្រឿងញៀន ជាបញ្ហារួមរបស់សង្គមជាតិទាំងមូល និងឈានទៅសម្រេចឆន្ទៈដ៏មុតស្រួចរបស់រាជរដ្ឋាភិបាលនីតិកាលទី៧ នៃរដ្ឋសភា ក្នុងការកាត់បន្ថយ ឈានទៅដល់ការលុបបំបាត់បញ្ហាគ្រឿងញៀននៅកម្ពុជា។ ឆ្លៀតក្នុងឱកាសនោះ លទ្ធផលនៃការអនុវត្តផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ លើកទី៩ របស់រាជរដ្ឋាភិបាល ប្រចាំឆមាសទី១ ឆ្នាំ២០២៤, គម្រោង ស្តីពីប្រតិបត្តិការត្រីកោណមាស ១៥១១ ខេត្ត, លទ្ធផលនៃការអនុវត្តការងារការិយាល័យទំនាក់ទំនង(BLO)កោះកុង និងលទ្ធផលនៃការអនុវត្តបទបញ្ជា ការណែនាំ របស់រាជរដ្ឋាភិបាល និងក្រសួង ស្ថាប័នពាក់ព័ន្ធ ត្រូវបានលើកយកធ្វើការផ្សព្វផ្សាយយ៉ាងទូលំទូលាយ ដោយមានការអញ្ជើញចូលរួមពី គណៈអភិបាលខេត្ត គណៈកម្មាធិការត្រួតពិនិត្យគ្រឿងញៀនខេត្ត និងលេខាធិការដ្ឋាន សាលាដំបូងខេត្ត អយ្យការអមសាលាដំបូងខេត្ត គណៈអភិបាលក្រុង ស្រុកទូទាំងខេត្ត កងកម្លាំងប្រដាប់អាវុធទាំងបី នគរបាលវរៈការពារព្រំដែនទឹក នគរបាលវរៈការពារព្រំដែនគោក សមត្ថកិច្ចច្រកទ្វារព្រំដែនអន្តរជាតិចាំយាម មន្ទីរ អង្គភាពជុំវិញខេត្ត លោកគ្រូ អ្នកគ្រូ សិស្សានុសិស្ស យុវជន អង្គការសង្គមស៊ីវិល វិស័យឯកជន និងអ្នកសារព័ត៌មាន សរុបចំនួន ២៧០នាក់ ស្រី ៦៨នាក់ ។

បន្ទាប់ពីការរៀបចំពិធីរដ្ឋបាល ត្រូវបានប្រារព្ធចប់សព្វគ្រប់ អង្គពិធីក៏បានរៀបចំដុតបំផ្លាញវត្ថុតាងគ្រឿងញៀន ដែលត្រូវបានដកហូតពីសំណុំរឿងស្ថាពរ ចំនួន ២៣សំណុំរឿង នូវថ្នាំញៀនប្រភេទមេតំហ្វេតាមីន ចំនួន ៣៥១.១១ក្រាម កញ្ឆាចំនួន ១កញ្ចប់ និងឧបករណ៍ជក់ថ្នាំញៀនមួយចំនួន ផងដែរ។
ថ្ងៃសុក្រ ៧ រោច ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២៨ ខែមិថុនា ឆ្នាំ២០២៤ June 28, 2024