លោក សុខ សុទ្ធី អភិបាលរងខេត្តកោះកុង អញ្ជើញជួបពិភាក្សាលើសំណើរបស់សមាគមអតីតយុទ្ធជនកម្ពុជាខេត្តកោះកុង ស្នើសូមទីតាំងដីសម្រាប់សាងសង់ទីស្នាក់ការ
លោក សុខ សុទ្ធី អភិបាលរងខេត្តកោះកុង ដោយមានការអនុញ្ញាត និងណែនាំពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញជួបពិភាក្សាជាមួយតំណាងសមាគមអតីតយុទ្ធជនកម្ពុជាខេត្តកោះកុង និងមានការចូលរួមពីមន្ទីរសង្គមកិច្ច អតីតយុទ្ធជន និងយុវនីតិសម្បទា មន្ទីរសេដ្ឋកិច្ច និងហិរញ្ញវត្ថុ មន្ទីររៀបចំដែនដី នគរូបនីយកម្ម សំណង់ និងសុរិយោដី លើសំណើរបស់សមាគមអតីតយុទ្ធជនកម្ពុជាខេត្តកោះកុង ស្នើសូមទីតាំងដីសម្រាប់សាងសង់ទីស្នាក់ការ។ តាមការពិភាក្សានេះ លោក សុខ សុទ្ធី តំណាងរដ្ឋបាលខេត្ត និងជាអនុប្រធានគណៈកម្មាធិការគ្រប់គ្រងដីរដ្ឋថ្នាក់ខេត្ត បានចង្អុលបង្ហាញទីតាំងដីរដ្ឋ ដែលគ្រប់គ្រងដោយរដ្ឋបាលខេត្តមួយកន្លែង មានទំហំ ៣៩៥៥ម៉ែត្រការ៉េ មានទីតាំងស្ថិតនៅក្នុងមណ្ឌលកុមារកំព្រាខេត្តកោះកុង ភូមិ១ សង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង។ បន្ទាប់ពីការចង្អុលបង្ហាញនេះ លោក សុខ សុទ្ធី បានណែនាំឱ្យក្រុមការងារចុះពិនិត្យទីតាំងដីជាក់ស្តែង និងចុចយកនិយាមកាដី ដើម្បីពិនិត្យពិភាក្សា ក្នុងការសាងសង់ទីស្នាក់ការសមាគមអតីតយុទ្ធជនកម្ពុជាខេត្តកោះកុង និងរក្សាទុកលំហក្នុងបរិវេណមណ្ឌលកុមារកំព្រា ហើយក្នុងករណីទីតាំងដីនេះ មានស្ថានភាពសមស្របអាចសាងសង់ទីស្នាក់ការសមាគមអតីតយុទ្ធជនកម្ពុជាខេត្តកោះកុងបាន រដ្ឋបាលខេត្តនឹងបន្តនីតិវិធីជូន។
ថ្ងៃព្រហស្បតិ៍ ១៤ កើត ខែជេស្ឋ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី២០ ខែមិថុនា ឆ្នាំ២០២៤ June 20, 2024
