លោក សុខ សុទ្ធី អភិបាលរងខេត្តកោះកុង ដោយមានការអនុញ្ញាតពីលោកជំទាវ មិថុនា ភូថង អភិបាល នៃគណៈអភិបាលខេត្តកោះកុង បានអញ្ជើញដឹកនាំកិច្ចប្រជុំពិភាក្សាជាមួយមន្ទីរ អង្គភាពពាក់ព័ន្ធ អាជ្ញាធរមូលដ្ឋាន និងដោយមានការអញ្ជើញចូលរួមពីតំណាងស្ថាប័នអយ្យការអមសាលាដំបូងខេត្តកោះកុង ពាក់ព័ន្ធនឹងការត្រៀមអនុវត្តវិធានរដ្ឋបាលចំពោះប្រជាពលរដ្ឋ ដែលបានទន្ទ្រានកាន់កាប់ សាងសង់រំលោភលើដីរដ្ឋ នៅក្នុងក្រុងខេមរភូមិន្ទ ខេត្តកោះកុង។ តាមរយៈកិច្ចប្រជុំនេះ លោក សុខ សុទ្ធី ក្នុងនាមរដ្ឋបាលខេត្ត បានណែនាំដូចខាងក្រោម ៖
១.សូមមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកោះកុង ពិនិត្យមើលទីតាំងដីខាងលើនេះ ថាតើបានវាស់វែង​ដើម្បីចុះបញ្ជីដីមានលក្ខណៈជាប្រព័ន្ធឬនៅ
២.រដ្ឋបាលក្រុងខេមរភូមិន្ទ សង្កាត់ស្មាច់មានជ័យ និងតំណាងការិយាល័យទី២ កងទ័ពជើងគោក ត្រូវសហការគ្នា ចុះទៅជួបផ្ទាល់ជាមួយអ្នកកំពុងទន្ទ្រានកាន់កាប់ដីរដ្ឋ ដោយថតចម្លងឯកសារបញ្ជាក់ការកាន់កាប់ដីរបស់អ្នកទាំងនោះ (ប្រសិនបើមាន) និងថតចម្លងឯកសារដូចជា អត្តសញ្ញាណប័ណ្ណ សៀវភៅស្នាក់នៅ សៀវភៅគ្រួសារ
៣. រដ្ឋបាលខេត្តនឹងជូនដំណឹង ចំនួន ៣ដងទៀតបន្ថែមពីលើការជូនដំណឹងរបស់ការិយាល័យទី២ កងទ័ពជើងគោក ដើម្បីឱ្យអ្នកទន្ទ្រានកាន់កាប់ដីរដ្ឋ ចាកចេញ និងរុះរើចេញពីដីរដ្ឋដោយខ្លួនឯង
៤.រដ្ឋបាលខេត្តនឹងឱ្យមេធាវី របស់រដ្ឋបាលខេត្តរៀបចំឯកសារដើម្បីដាក់ពាក្យបណ្តឹងព្រហ្មទណ្ឌចំពោះអ្នកទន្ទ្រានកាន់កាប់ដីរដ្ឋ។
ថ្ងៃអង្គារ ១៣ រោច ខែពិសាខ ឆ្នាំរោង ឆស័ក ពុទ្ធសករាជ ២៥៦៨ ត្រូវនឹងថ្ងៃទី៤ ខែមិថុនា ឆ្នាំ២០២៤ June 4, 2024