រដ្ឋបាលខេត្តកោះកុង

បណ្ឌិត អ៊ុក ភ័ក្ត្រា អភិបាលរង នៃគណៈអភិបាលខេត្ត តំណាងលោកជំទាវអភិបាលខេត្តកោះកុង បានអញ្ជើញដឹកនាំគណៈប្រតិភូខេត្ត អញ្ជើញទស្សនកិច្ចនៅក្រុមហ៊ុន KASEN GROUP ស្ថិតក្នុងក្រុងហៃនីន ខេត្តចេជាង នៃសាធារណរដ្ឋប្រជាមានិតចិន។ បេសកកម្មនេះ គឺតបតាមការអញ្ជើញរបស់ក្រុមហ៊ុន ខេមបូឌាន ចេជាង ហ្គរជី អេសអ៊ីហ្សេត ខូអិលធីឌី .ឯ.ក CAMBODIAN ZHEJIANG
GUOJI SEZ CO., LTD. ដែលជាបុត្រសម្ព័ន្ធរបស់ក្រុមហ៊ុន KASEN GROUP ជាក្រុមហ៊ុនធំមួយ មានក្រុមហ៊ុនបុត្រសម្ព័ន្ធជាច្រើន ផ្តោតសំខាន់លើវិស័យ រោងចក្រផលិតផលិតផលស្បែកសត្វ ធ្វើគ្រឿងសង្ហារឹមអំពីស្បែកសត្វ និងជំនាញលើការអភិវឌ្ឍទីក្រុង របស់ខេត្តចេជាង នៃសាធារណរដ្ឋប្រជាមានិតចិន។ ក្នុងនោះសម្រាប់ប្រទេសកម្ពុជា ក្រុមហ៊ុន KASEN GROUP ក៏បានបង្កើតរោងចក្រក្នុងតំបន់សេដ្ឋកិច្ចពិសេសនៅខេត្តព្រះសីហនុ និងកំពុងរៀបចំតំបន់សេដ្ឋកិច្ចពិសេស ក្នុងស្រុកស្រែអំបិល ខេត្តកោះកុង លើផ្ទៃដីទំហំ ៧០៧ហិកតា។ នៅព្រឹកថ្ងៃទី១៣ ខែឧសភា នេះ ប្រតិភូខេត្តកោះកុង បានមកទស្សនកិច្ចអំពីខ្សែចង្វាក់ផលិតកម្ម នៅរោងចក្រផលិតស្បែកសត្វ និងគ្រឿងសង្ហារឹមធ្វើពីស្បែកសត្វ នៅទីក្រុងហៃនីន ខេត្តចេជាង ដែលរោងចក្រនេះក៏បានបង្កើតនៅក្នុងតំបន់សេដ្ឋកិច្ចពិសេស នៃខេត្តព្រះសីហនុ និងកំពុងសាងសង់នៅក្នុងតំបន់សេដ្ឋកិច្ចពិសេសចេជាង នៃស្រុកស្រែអំបិល ខេត្តកោះកុង ផងដែរ។  លោកតំណាងក្រុមហ៊ុន បានបញ្ជាក់ថា ផលិតផលស្បែកសត្វ និងគ្រឿងសង្ហារឹមធ្វើពីស្បែកសត្វ នេះ ភាគច្រើនគឺនាំចេញទៅលក់នៅតំបន់អឺរ៉ុប ហើយផលិតផលស្បែកសត្វនេះគឺ មានវត្ថុធាតុដើមជាស្បែកយកមកពីប្រទេសអ៊ីតាលី (ស្បែកសត្វលេខ១) និងប្រភេទលេខ២ គឺផលិតក្នុងប្រទេសចិន ក្នុងនោះរោងចក្រ និងបុគ្គលិកជំនាញ ក៏នឹងបញ្ជូនទៅធ្វើការនៅតំបន់សេដ្ចកិច្ចពិសេសខេត្តព្រះសីហនុ និងតំបន់សេដ្ចកិច្ចពិសេសចេជាង ខេត្តកោះកុងផងដែរ ដែលក្នុងតំបន់សេដ្ឋកិច្ចពិសេសចេជាង ក្នុងស្រុកស្រែអំបិល ខេត្តកោះកុង នឹងមានរៀបចំរោងចក្រជាច្រើន ដែលអាចទាញស្រូបកម្លាំងពលកម្មប្រមាណ១ម៉ឺននាក់ សម្រាប់ជំហានទី១ និងកើនដល់៥ម៉ឺននាក់សម្រាប់ពេលអនាគត ។ លោកបណ្ឌិត អ៊ុក ភ័ក្រ្តា អភិបាលរងខេត្ត និងជាប្រធានប្រតិភូ ក៏បានបញ្ជាក់ផងដែរថា លោកសាទរចំពោះការវិនិយោគរបស់ក្រុមហ៊ុន KASEN Group ដែលជាការចូលរួមលើកកម្ពស់សេដ្ឋកិច្ចប្រទេសកម្ពុជា និងបង្កើតការងារសម្រាប់ពលករទាំងក្នុងខេត្ត និងក្រៅខេត្ត ក្នុងនោះតំបន់សេដ្ឋកិច្ចពិសេសចេជាង គឺមានហេដ្ឋារចនាសម្ព័ន្ធល្អ ទាំងប្រព័ន្ធទឹក ភ្លើង និងការគ្រប់គ្រងសំរាម ព្រោះសំរាមនឹងត្រូវបានបំប្លែងជាថាមពលអគ្គិសនីវិញផងដែរ។
ថ្ងៃចន្ទ ៦ កើត ខែពិសាខ ឆ្នាំរោង ឆស័ក ពុទ្ធសករាជ ២៥៦៧ ត្រូវនឹងថ្ងៃទី១៣ ខែឧសភា ឆ្នាំ២០២៤ May 13, 2024