រដ្ឋបាលឃុំកោះស្ដេច

តាមការចាត់តាំងពីលោក សាយ ហេង មេឃុំកោះស្ដេច លោក ស៊ន ស្រិញ ជំទប់ទី១ បានដឹកនាំអនុភូមិកោះស្ដេច ចូលរួមសហការជាមួយខណ្ឌរដ្ឋបាលជលផលកោះកុង និងតំណាងក្រុមហ៊ុនកោះអភិជនរីសត ធ្វើការព្រលែងអណ្ដើកសមុទ្រប្រភេទល្មិច (Chelonia mydas) ចំនួនពីក្បាលដែលបានជួយសង្គ្រោះពីការជាប់ទាក់នឹងមងខ្មោចដោយអ្នកនេសាទកាលពីពេលកន្លងទៅថ្មីៗនេះ ដើម្បីធ្វើការលែងចូលទៅក្នុងសមុទ្រវិញ ស្ថិតនៅភូមិកោះស្តេច ឃុំកោះស្ដេច ស្រុកគិរីសាគរ ខេត្តកោះកុង។ អណ្ដើកសមុទ្រទីមួយត្រូវបានដាក់ឈ្មោះថា “សំណាង” មានទំហំស្នូកបណ្ដោយប្រវែង ៥០ សង់ទីម៉ែត្រ ទទឹង ៤៦ សង់ទីម៉ែត្រ មានទម្ងន់ ១៣,៧ គីឡូក្រាម ហើយបានកិបស្លាកសម្គាល់ KH2402 និងអណ្ដើកសមុទ្រទីពីរត្រូវបានដាក់ឈ្មោះថា “មីនា” មានទំហំស្នូកបណ្ដោយប្រវែង ៥០ សង់ទីម៉ែត្រ ទទឹង ៤៥ សង់ទីម៉ែត្រ មានទម្ងន់ ១០,១ គីឡូក្រាម ហើយបានកិបស្លាកសម្គាល់ KH2403។ រដ្ឋបាលឃុំកោះស្ដេច សូមគោរពថ្លែងអំណរគុណជូនចំពោះក្រុមហ៊ុនកោះអភិជនរីសត ដែលបានជួយផ្សព្វផ្សាយបន្តជូនដល់អ្នកនេសាទឱ្យកាន់តែមានការយល់ដឹងអំពីការអភិរក្សអណ្ដើកសមុទ្រនៅកម្ពុជា ជាពិសេសបងប្អូនប្រជានេសាទនៅតំបន់កោះស្ដេច។ សូមបញ្ជាក់ថា អណ្ដេីកសមុទ្រគ្រប់ប្រភេទទាំងអស់ត្រូវបានចាត់ចូលជាប្រភេទធនធានជលផលសមុទ្រកំពុងរងគ្រោះថ្នាក់ និងត្រូវបានការពារដោយច្បាប់ស្ដីពីជលផល ដូច្នេះរដ្ឋបាលឃុំកោះស្ដេច សូមអំពាវនាវដល់បងប្អូនប្រជានេសាទទាំងអស់រួមគ្នាការពារ និងអភិរក្សសត្វអណ្ដេីកសមុទ្រ ដោយរាយការណ៍ជូនអាជ្ញាធរមូលដ្ឋាននៅពេលនេសាទបានដោយចៃដន្យ ឬជួយសង្រ្គោះពីការទាក់ជាប់មងខ្មោច ឬឧបករណ៍នេសាទផ្សេងៗ។

ថ្ងៃអង្គារ ១០កើត ខែផល្គុន ឆ្នាំថោះ
បញ្ចស័ក ពុទ្ធសករាជ ២៥៦៧
ត្រូវនឹងថ្ងៃទី១៩ ខែមីនា ឆ្នាំ២០២៤
March 19th, 2024