លោក សុប ប៉ាស្សារី អភិបាលរង នៃគណៈអភិបាលក្រុងខេមរភូមិន្ទ លោកស្រី ហ៊ីម សោភ័ណ នាយករដ្ឋបាលក្រុង និងលោកស្រី ឃឹម ចាន់ដាវីប្រធានការិយាល័យច្រកចេញចូលតែមួយក្រុង បានអញ្ចើញចូលរួមក្នុងកិច្ចប្រជុំពិភាក្សា ការចុះពិនិត្យ វាយតម្លៃអំពីការអនុវត្តមុខងារដែលបានផ្ទេរ និងធ្វើប្រតិភូកម្មលើការផ្តល់សេវាដឹកជញ្ជូនផ្លូវគោក-ផ្លូវទឹក។ ក្នុងគោលបំណងដើម្បីពង្រឹងប្រសិទ្ធភាពការងារការផ្តល់សេវាសាធារណៈរបស់ ក្រសួងសាធារណការ និងដឹកជញ្ជូន ដែលបានផ្ទេរមុខងារ និងធ្វើប្រតិភូកម្មការផ្តល់សេវាដឹកជញ្ជូនផ្លូវគោក-ផ្លូវទឹក នៅតាមអង្គភាពច្រកចេញចូលតែមួយខេត្ត និងការិយាល័យច្រកចេញចូលតែមួយ ក្រុង ស្រុក ។ កិច្ចប្រជុំនេះស្ថិតក្រោមអធិបតីភាពដ៏ខ្ពង់ខ្ពស់ ឯកឧត្តម មាស ម៉ូនីកា អនុរដ្ឋលេខាធិការ និងជាអនុប្រធានគណៈកម្មការដឹកនាំកំណែទម្រង់ វិមជ្ឈការ និងវិសហមជ្ឈការ នៃក្រសួងសាធារណការ និងដឹកជញ្ជូន និងលោកស្រី អុី នារីនេត អភិបាលរង នៃគណៈអភិបាលខេត្តកោះកុង។ កិច្ចប្រជុំនេះបានរៀបចំឡើងនៅសាលប្រជុំសាលាខេត្តកោះកុង។
វេលាម៉ោង៨:០០នាទីព្រឹក ថ្ងៃសុក្រ ៦កើត ខែផល្គុន ឆ្នាំថោះ បញ្ចស័ក ពុទ្ធសករាជ ២៥៦៧ ត្រូវនឹងថ្ងៃទី១៥ ខែមីនា ឆ្នាំ២០២៤។
March,15,2024

#ប្រភពពីរដ្ឋបាលក្រុងខេមរភូមិន្ទ#